अखबार नेपाल ट्रेन्डिङ

काठमाडौं: नेपाल शिक्षक महासङ्घले आजदेखि काठमाडौं केन्द्रित आन्दोलन थालेको छ । आज दिउँसो माइतीघरमण्डलदेखि नयाँबानेश्वरसम्मको सडकमा शिक्षकहरू प्रदर्शनमा उत्रिएका थिए । गत माघ २० गतेदेखि आन्दोलनमा रहेको महासंघले ‘काठमाडौं जा‍औँ अभियान’सहित अनिश्चितकालीन शैक्षिक आन्दोलन थालेको हो ।

उनीहरूले शिक्षा ऐन जारी गर्न र विगतका सम्झौता कार्यान्वयन गर्न सरकारको ध्यानाकर्षण गराइरहेका छन् । यसअघि शिक्षा तथा मानव स्रोत विकास केन्द्र सानोठिमी भक्तपुरमा रिले अनशनमा बसेर आन्दोलन सुरु गरेका उनीहरू यसपटक सडकमा ओर्लिएका हुन् । शिक्षा ऐन जारी गर, शिक्षकलाई ढाँट्न पाइँदैन, संसद् अधिवेशन चालु गरलगायतको मागसहितको नारा लगाउँदै प्रदर्शन गरिरहेका छन् ।

महासंघले सडक केन्द्रित आन्दोलन माग पूरा नहुन्जेल चलिरहने बताएको छ । संसद्को शिक्षा स्वास्थ्य तथा सूचना प्रविधि समितिमा दफावार छलफलका क्रममा रहेको विद्यालय शिक्षा विधेयकलाई चाँडोभन्दा चाँडो ऐनको रूप दिनुपर्ने उनीहरूको माग छ । ऐनमा शिक्षकसँग यसअघि भएका सहमति हुबहु कार्यान्वयन हुनुपर्ने माग उनीहरूले राखेका छन् । यसअघि गएको असोज पहिलो साता भएको शिक्षकको पाँचदिने सडक आन्दोलनपछि सरकारसँग सातबुँदे सहमति भएको थियो। तर सहमति कार्यान्वयन भएको छैन ।

महासङ्घका अध्यक्ष लक्ष्मीकिशोर सुवेदीले संसदमा छलफलमा रहेको विद्यालय शिक्षा विधेयक यथाशीघ्र ऐन जारी गर्न माग सहित आन्दोलन जारी राखिएको बताए । गुणस्तरीय विद्यालय शिक्षा, विद्यार्थी र शिक्षक कर्मचारीमैत्री अग्रगामी विद्यालय शिक्षा ऐन जारी गराउन राज्य पक्षलाई दबाब दिन आन्दोलन थालिएको अध्यक्ष सुवेदीले बताएका छन् । आन्दोलनमा देशभरका अधिकांश शिक्षक तथा कर्मचारी सहभागी छन् । आन्दोलनमा आएका शिक्षक तथा कर्मचारी विद्यालय शिक्षा ऐन जारी नहुँदासम्म काठमाडौंबाट नफर्किने महासङ्घले जनाएको छ ।