अखबार नेपाल ट्रेन्डिङ

काठमाडौं: राजावादीको हिंसात्मक आन्दोलनको क्रममा चैत १५ गते कोटेश्वरको भाटभटेनी सुपरमार्केट लुटपाटको घटना नियन्त्रणमा बहादुरी देखाउने सुरक्षा गार्ड दुरप्रसाद पराजुली पुरस्कृत भएका छन् । उनलाई भाटभटेनी सुपरमार्केटले ५ लाख नगद रुपैयाँ र पाँच ग्रेड बढुवासहित सम्मान प्रदान गरेको छ ।

भाटभटेनी सुपरमार्केटका सञ्चालक मीनबहादुर गुरुङले गत यही १५ गतेको घटनामा बहादुरी देखाउने सुरक्षा गार्ड पराजुलीलाई पाँच लाख १ हजार १११ नगद रुपैयाँ पुरस्कार प्रदान गरेका छन् । उनले पराजुलीलाई पाँच ग्रेड बढुवा गरिएको घोषणा समेत गरेका छन् । पराजुलीसँगै अन्य चारजना सुरक्षा गार्डलाई पनि ५१ हजार १५१ रुपैयाँ प्रदान गरिएको कम्पनीले जनाएको छ ।

गएको शुक्रबार राजावादीहरूको हिंसात्मक प्रर्दशनका क्रममा भएको तोडफोड तथा लुटपाटबाट ८० लाख भन्दा बढीको क्षति भएको सो कम्पनीले जनाएको छ । राजावादी समूहका कार्यकर्ता प्रवेश गरेर भाटभटेनी तोडफोड गर्नुका साथै लुटपाट गरेका थिए । लुटपाटका क्रममा भाटभटेनीका सुरक्षा गार्ड पराजुलीले एक्लै प्रतिकार गरेका थिए । उनले लुटेराहरूलाई पिट्दै लखेटेको भिडिओ सामाजिक सञ्जालमा भाइरल भएको छ ।

सम्मानपछि पराजुलीलाई केही बोल्न आग्रह गरियो । सम्भवतः पहिलोपल्ट यसरी माइकमा सम्बोधन गरेका पराजुलीले केही लजाउँदै आफ्नो भनाइ राखे । उनले २२ वर्षदेखि भाटभटेनीमा जागिर खाएको र घरगाडी जोडेको सुनाउँदा कार्यक्रमका सहभागीले हौसलामा ताली बजाएका थिए ।