अखबार नेपाल ट्रेन्डिङ

काठमाडौं: नेकपा माओवादी केन्द्रले पार्टीको क्षयीकरणको विषयमा गम्भीर परामर्शमा जुटेको छ । शुक्रबारदेखि जारी माओवादी पदाधिकारीको बैठक मंगलबार सकिँदै छ । अब स्थायी समिति र केन्द्रीय समितिको बैठक बोलाइने नेताहरुले बताएका छन् । अब पार्टीका सम्पूर्ण संरचना चलायमान बनाएर जनतासँग टुटेको कडी जोड्ने माओवादीले जनाएको छ ।

सरकारबाट बाहिरिएपछि पूर्णतया सांगठनिक सुदृढीकरणमा केन्द्रित हुने बताएको माओवादीमा सांगठनिक क्षयीकरणको दोष कतिपय नेताहरुले मूल नेतृत्वलाई लगाएर आफू सही बन्न प्रयत्नशील रहेको बताइन्छ । हालै जारी पदाधिकारी बैठकमा समेत सरकारमा रहँदा गरिएका सुशासनमैत्री कामलाई जनता समक्ष लगेर पार्टीको पक्षमा जनमत फर्काउने दाउमा माओवादी केन्द्र लागेको छ ।

माओवादीमा नेतृत्वमा निर्विकल्प देखिएका पुष्पकमल दाहाल प्रचण्डका बारेमा पनि प्रश्न उठ्न थालेको बताइएको छ । माओवादीले नीति र नेतृत्व दुबैमा गम्भीर समीक्षा गर्दै आगामी रणनीति तय गर्नेसम्मको तयारी रहेको नेताहरुले बताइरहेका छन् । माओवादीको नेतृत्वमा तीन दशक देखि प्रचण्डकै एकल बर्चस्व कायम रहेको छ । उनी पछि पार्टी नेतृत्वको उत्तराधिकारीको विकास हुन सकेको छैन ।

२०६३ मा संसदीय राजनीतिमा प्रवेश गरेको माओवादी सुरुमा कायम गरिएको जनमत विस्तारै गुमाउँदै लगेको छ । जनताको विश्वास टुटाएर कमजोर बनेको माओवादीले यस अघि जनसम्बन्ध सुदृढ बनाउन चार महिने अभियान समेत सञ्चालन गरेको थियो । पदाधिकारी बैठक पछि स्थायी समिति र केन्द्रीय समिति बैठक बोलाएर संगठनात्मक कार्यलाई तिब्रता दिने माओवादीको तयारी रहेको छ । पार्टीलाई सांगठनिक रुपमा मजबुद बनाउन नेताहरुले जनतासँगको सम्बन्धलाई पुनर्ताजगी दिने बताइरहेका छन् ।