अखबार नेपाल ट्रेन्डिङ

काठमाडौं: काठमाडौं जिल्ला अदालतमा सुरक्षाका लागि खटिएका प्रहरीमाथि हातपात गरिएको भन्दै गम्भीर आपत्ति जनाएको छ । अदालतका कर्मचारीहरूले प्रहरीमाथि हातपात गर्ने कानुन व्यवसायी नानी थापा भन्ने लक्ष्मी थापालाई कानुनबमोजिम कारबाही गर्न माग गरेका छन् ।

कानुन व्यवसायी थापाले आइतबार अदालतको गेट ३ मा ड्युटीमा खटिएका प्रहरी कर्मचारीलाई अपशब्द प्रयोग गर्दै झापड हानेको कर्मचारीहरूले प्रशासनलाई ध्यानाकर्षण गराएका छन् । ‘ड्युटीमा खटिएका प्रहरी कर्मचारीलाई कानुन व्यवसायी नानी थापा भन्ने लक्ष्मी थापाले ‘सिपाही भएर बढ्ता बोल्ने’ भन्दै अपशब्द प्रयोग गर्दै झापड हानी ड्युटीमा खटिएको राष्ट्रसेवक कर्मचारीप्रति अभद्र व्यवहार गरेको घटनाप्रति काठमाडौं जिल्ला अदालतका कार्यरत हामी सम्पूर्ण कर्मचारीहरूको गम्भीर ध्यानाकर्षण भएको छ ।

अदालतको सुरक्षामा खटिएका प्रहरी कर्मचारीलाई आफ्नो कर्तव्य पालनाको सिलसिलामा हातपात गरी समग्र कर्मचारी र सुरक्षाकर्मीको मनोबल घटाउने मनसायले गरिएको आपराधिक कार्यप्रति घोर भर्त्सना गर्दै यस्तो गल्ती/आपराधिक कार्यमा संलग्न व्यक्ति उपर जाहेरी दरखास्त दर्ता गरी कानुनी कारबाही अघि बढाउन अनुरोध गर्दछौं,’ पत्रमा भनिएको छ ।