अखबार नेपाल ट्रेन्डिङ

काठमाडौं: नेपालीहरुको दोस्रो ठूलो चाड तिहार आजबाट शुरु भएको छ । यमपञ्चकको पहिलो दिन आज काग तिहार पर्व आज यमराजको दूतका रुपमा कागलाई मीठो मीठो चीजविज खान दिएर मनाइँदैछ । कार्तिक कृष्ण त्रयोदशीकै दिन सुरु हुने यमपञ्चक भने यस वर्ष तिथिको घटबढका कारण शुक्रबार बेलुकीदेखि नै शुरु भएको छ ।

शुक्रबार बेलुकी त्रयोदशी तिथि लाग्ने भएकाले यमपञ्चक शुरु गर्ने निर्णय गरिएको नेपाल पञ्चाङ्ग निर्णायक समितिले जनाएको छ । यमपञ्चकको हरेक दिनका आ-आफ्नै धार्मिक मान्यताहरु छन् । आज धन त्रयोदशी अर्थात् धन्तेरस । विशेषगरी तीहारको किनमेलको लागि आजको दिन निक्कै उत्तम मानिन्छ । आजको दिन खरिद गरेका सामाग्रीहरु राखेर लक्ष्मी पूजा गरेमा लक्ष्मी माता खुसी भई हामीलाई धनधान्यले सम्पन्न गराउने जनविश्वास छ ।

धन्तेरसको दिन कमलको पुष्पासनमा बसेकी माता लक्ष्मीजी र गणेशजीको मुर्ति, तस्वीर घर भित्र्याउनु शुभ मानिन्छ गच्छे अनुसार कसैकसैले माटोको मुर्ति वा तस्वीर खरिद गरेर भित्र्याउने गरेका छन् । धनतेरसमा मुर्ति लिंदा माता लक्ष्मीजी कमलको पुष्पासनमा बसेको हुनुपर्ने, उभिएको हुन नहुने मान्यता छ । यसो गर्दा अन्नले भरिपूर्ण तथा स्थायी लक्ष्मीको वास हुने जनविश्वास छ ।