अखबार नेपाल ट्रेन्डिङ

काठमाडौं: नेपाली कांग्रेसका महामन्त्री गगन थापाले नेपालगन्जमा सम्प्रदायिकता भड्काउने खालका गतिविधि भएको भन्दै उनले शान्ति सुव्यवस्था कायम गर्न सरकारसँग माग गरेका छन् ।

‘धार्मिक, सामाजिक, सांस्कृतिक तथा जातीय सहअस्तित्व, सहिष्णुता तथा सद्भाव भड्काएर सामाजिक विद्वेष तथा घृणा फैलाउने कुत्सित अभीष्टले सामाजिक सञ्जालमा भ्रामक, कपोलकल्पित, उत्तेजक र द्वेषपूर्ण विचार व्यक्त गरेको कारणले हिजोदेखि नेपालगञ्जमा कर्फ्यु जारी गर्नु परेको छ, जुन गम्भीर चिन्ताको विषय हो,’ सामाजिक सञ्जालमा उनले भनेका छन् ।

धार्मिक, सामाजिक तथा सांस्कृतिक सद्भाव, सहिष्णुता तथा सहअस्तित्व कायम गरी समाजमा अविलम्ब शान्ति र सुव्यवस्था बहाल गर्न उनले सरकारसँग माग गरे । विश्व शान्तिका प्रतीक भगवान गौतम बुद्धको जन्मभूमि तथा शान्तिभूमि नेपालबाट विश्वलाई शान्ति, सहिष्णुता, सद्भाव र सहअस्तित्वको सन्देश प्रवाह गर्नुपर्ने उनको भनाइ छ ।

‘यो गौरवमय पहिचान र परम्परालाई हामीले कायम राख्नुपर्छ । त्यसैले हाम्रो देश नेपाल र हामी नेपालीको मौलिक र गौरवमय पहिचान, परम्परा र स्वभाव विपरीत धार्मिक, सामाजिक तथा सांस्कृतिक सदभाव भड्काउने अवाञ्छित क्रियाकलापप्रति सचेत हुँदै शान्ति, सहिष्णुता तथा सहअस्तित्वको सन्देश प्रवाह गर्न सबै धार्मिक, सांस्कृतिक तथा जातीय समुदायप्रति विनम्रतापूर्वक हार्दिक अपिल गर्दछु,’ उनले भने ।

विगत केही समयदेखि देशका विभिन्न भागमा धार्मिक, सामाजिक सद्भाव भड्काउने खालका अवाञ्छित र रहस्यमय गतिविधि भएको भन्दै उनले हामी सबैको मानवतावाद एउटै रहेको बताए । ‘हामीहरूको धार्मिक आस्था फरक होला, पाठ गर्ने धार्मिक ग्रन्थ फरक होलान, प्रार्थना गर्ने मन्त्र फरक होला । तर आफ्नो धर्म, आस्था र प्रार्थना एउटै छ । त्यो हो- मानवतावाद, शान्ति र धार्मिक तथा सांस्कृतिक सहिष्णुता, सदभाव तथा सहअस्तित्व,’ उनले भने ।

उनले नेपाल बहुधार्मिक, बहुसांस्कृतिक, बहुजातीय तथा बहुभाषिक राष्ट्र भएको र आफ्नो धार्मिक तथा सांस्कृतिक आस्था अनुसार धर्म र संस्कृति अनुसरण तथा अभ्यास गर्ने स्वतन्त्रता हरेक नेपाली नागरिकलाई रहेको बताए । यो मौलिक अधिकारलाई नेपालको संविधानले समेत पूर्ण प्रत्याभूति गरेको उनको भनाइ छ ।