अखबार नेपाल ट्रेन्डिङ

काठमाडौं: राजस्व अनुसन्धान विभागले बरामद गरेको ६० किलो सुन तस्करी प्रकरणको अनुसन्धानमा प्रहरीको केन्द्रीय अनुसन्धान ब्युरो (सीआईबी) ले इन्टरपोलको सहयोग मागेको छ ।

हङकङबाट तस्करले भित्र्याएको सुन तस्करीमा चिनियाँ र भारतीय नागरिक पनि जोडिएपछि सीआईबीले इन्टरपोलको सहयोग मागेको हो । यस्तै यी देशका प्रहरीसँग पनि समन्वय गरिरहेको प्रहरी प्रधान कार्यालय स्रोतले जनाएको छ ।

सीआईबीले नेपालमा सुन तस्करीमा संलग्न केही चिनियाँ देश फर्किसकेको पाइएपछि त्यहाँको पनि सहयोग लिन इन्टरपोल शाखा मार्फत इन्टरपोललाई पत्राचार गरेको छ । गत साउन ३ गते राजस्व अनुसन्धान विभागले बरामद गरेको करिब ६० किलो सुन हङकङबाट ब्रेक प्याडमा भित्रिएको थियो । भन्सार जाँच पास भइसकेको अवस्थामा राजस्वले बरामद गरेर गिरोहका केही सदस्यलाई तत्काल पक्राउ गरेको थियो ।

यो प्रकरणमा भन्सारका कर्मचारी, भन्सार एजेन्ट, केही नेपाली गिरोह र चिनियाँ गिरोहका ७ जना पक्राउ परेका छन् । सुन तस्करीमा संलग्न रहेको आरोपमा अहिलेसम्म २३ जना पक्राउ परिसकेका छन् । यस्तै थप केही चिनियाँसहितको संलग्नता पुष्टि भए पनि उनीहरु फरार छन् ।

यस्तै चिनियाँ गिरोहका भारतीय प्रेमिकालाई पनि सीआईबीले पक्राउ गरेको छ । अहिलेसम्म उनीहरुको सुन तस्करीमा संलग्नता नखुले पनि थप अनुसन्धान भइरहेको प्रहरी उच्च स्रोतले जानकारी दिएको छ । यसअघि भारतमा सुन तस्करीमै पक्राउ परेर सजाय भुक्तान गरेर छुटेकाहरु पनि नेपालमा सुन तस्करीमा संलग्न रहेको पाइएपछि थप अनुसन्धानका लागि नेपाल प्रहरीले भारतीय प्रहरीसँग पनि छुट्टै समन्वय गरिरहेको छ ।