बन्चरेडाँडाका स्थानीयद्वारा आजदेखि फोहोर फाल्नमा रोक
वि.सं.२०८० साउन १ सोमवार ११:४८
काठमाडौं: नुवाकोटको बन्चरेडाँडा ल्यान्डफिल्ड साइटमा स्थानीयले आजदेखि फोहोर फाल्नमा रोक लगाएका छन् । ल्याण्डफिल्ड साइटमा फोहोर लिएर जाने गाडीलाई स्थानीयले रोकेका हुन् ।
स्थानीयहरुले आफ्ना माग पुरा नभएसम्म फोहोर फाल्न नदिने पनि बताएका छन् । सरकार र काठमाडौं महानगरपालिकाले सहमति कार्यान्वयन नगरेको भन्दै नुवाकोटको ककनी गाउँपालिका र धादिङको धुनीबेँसी नगरपालिकाका वासिन्दाले आजदेखि फोहोर विसर्जनमा अवरोध गरेका हुन् ।
यसैबीच, ककनी गाउँपालिकाले फोहोर बोकेर बन्चरेडाँडा जाने हरेक सवारी साधनबाट १५ सयसम्म शुल्क लिने निर्णय गरेकोमा ककनी गाउँपालिकाविरुद्ध सर्वोच्च अदालतमा रिट दायर भएको छ । फोहोरमैला व्यवस्थापन संघको तर्फबाट धनप्रसाद आचार्यले गाउँपालिकाको निर्णयविरुद्ध रिट दायर गरेका हुन् । सो रिटको पेशी आजलाई तोकिएको छ ।
वि.सं.२०८० साउन १ सोमवार ११:४८