अखबार नेपाल ट्रेन्डिङ

काठमाडौं: यतिखेर अमेरिकी सहयोग परियोजनाका कारण यतिखेर सत्तागठबन्धनमा रहेका दलहरुबीच खटपट सिर्जना भईरहेको छ ।

सत्तारुढ दल नेपाली कांग्रेसको बिहीबार बसेको कार्यसम्पादन बैठकले एमसीसी परियोजना संसदबाट पारित गर्नेपर्ने निर्णय गरेको छ  ।

उता गठबन्धनकै साझेदार नेकपा माओवादी केन्द्रका अध्यक्ष पुष्प कमल दाहाल(प्रचण्ड) र नेकपा एकीकृत समाजवादीका अध्यक्ष माधवकुमार नेपालले एमसीसी यथास्थितिमा पारित गर्न नहुने अडान राखिराखेका छन् ।

यस्तो अवस्थामा एमसीसी पास गर्नका लागि प्रधानमन्त्री एवम् नेपाली कांग्रेसका सभापति शेरबहादुर देउवालाई सकस भईरहेको छ ।

प्रधानमन्त्री देउवाले गठबन्धन नै टुटेपनि एमसीसी संसदबाट पारित गराउने भित्री रणनीतिमा लागिरहेका छन् । उनलाई तगारो भने आफ्नै गठबन्धनभित्रका नेताहरुले हालिरहेका छन् ।

एउमसीसीकै विषयमा माओवादी केन्द्रका अध्यक्ष दाहालले एमसीसी मुख्यालयलाई पठाएको पत्र र उनले देखाएको द्वैध चरित्रका कारण माओवादी पार्टीभित्र पनि खैलाबैला मच्चिएको छ ।

उनको दुईजिब्रे कुराकै कारण मिडिया यो हप्ता प्रचण्डमय बन्यो ।

प्रधानमन्त्री देउवालाई अहिले एमसीसी पारित गर्नुको अर्को विकल्प देखिदैन । बिहीबार मात्र अमेरिकी विदेशमन्त्रीले एक खालको धम्कीकै भाषामा एमसीसी पास गराउन फोन गरेरै दबाब दिएका छन् ।

यो अवस्थामा देउवाले गठबन्धन टुटाएरै भएपनि एमसीसी पास गराउने पक्षमा देखिएका छन् भने त्यसको भित्री तयारी गरिरहेका छन् ।

गठबन्धन टुट्यो भने प्रमुख प्रतिपक्षी दल नेकपा एमालेको साथ लिनुपर्ने अवस्था छ ।

यदि यस्तो अवस्था आयो भने आफूहरुको राजनीतिक भविष्य कमजोर हुने चिन्ता प्रचण्ड र नेपाललाई रहेको छ  ।

त्यही भएर पनि प्रधानमन्त्री देउवालाई घुक्र्याउने रणनीतिका साथ उनीहरु लागिरहेको स्पष्ट देख्न सकिन्छ  ।

प्रचण्ड नेपालको यो छटपटी कहिलेसम्म रहने हो हेर्न बाँकी छ ।