अखबार नेपाल ट्रेन्डिङ

काठमाडौं: झण्डै एक सातादेखि इजलास बहिष्कार गरेका सर्वोच्च अदालतका न्यायाधीशहरु अन्ततः इजलासमा फर्किएका छन् ।

गत आइतबारदेखि आन्दोलनरत न्यायाधीशहरुले इजलास बहिष्कार गरेको एक सातापछि फर्किएर मुद्दाको सुनुवाइ गरेका हुन् ।

सोमबार बसेको न्यायाधीशहरुको बैठकले बन्दी प्रत्यक्षीकरणका मुद्दा हेर्ने निर्णय गरेका हुन् । प्रधानन्यायाधीश चोलेन्द्र शम्शेर जबराले पनि विहान बन्दी प्रत्यक्षीकरणका मुद्दा मात्रै पेशी चढाएर इजलास तोकेका थिए ।

सोही बमोजिम दुईवटा एकल र चार वटा संयुक्त इजलासमा ६ वटा बन्दी प्रत्यक्षीकरण मुद्दामा सुनुवाई भएको सर्वोच्च अदालतका प्रवक्ता बाबुराम दाहालले जानकारी दिए ।

प्रधानन्यायाधीश जबराको राजीनामा माग गर्दै न्यायाधीशहरूले कात्तिक ८ गतेदेखि इजलास बहिष्कार गर्दै आएका थिए ।

प्रधानन्यायाधीश जबराले सम्मानजनक बहिर्गमनको सन्देश दिएपछि न्यायाधीशहरुको तीन सदस्यीय अनौपचारिक वार्ता टोलीले जबरासँग वार्ता गरेको थियो ।

सोही बमोजिम प्रधानन्यायाधीशले इजलास गठन गरेका र न्यायाधीशहरु काममा फर्किएका हुन् ।