अखबार नेपाल ट्रेन्डिङ

काठमाडौं: नेकपा माओवादी केन्द्रले केपी ओली नेतृत्वको प्रतिगामी सरकारको विस्थापन गर्नुपर्ने निष्कर्ष निकालेको छ ।

आज बसेको नेकपा माओवादी केन्द्रको बैठकमा नेताहरुले अहिले पहिलो र तात्कालिक कार्यभार नै ओली नेतृत्वको सरकार विस्थापन गर्दै नयाँ संयुक्त सरकार गठन गर्नु रहेको बताएका हुन् ।

पछिल्लो राजनीतिक अवस्था, नयाँ सरकार गठन र सांगठनिक प्रक्रियाबारे छलफल गर्न बसेको माओवादी केन्द्रको बैठकमा शीर्ष नेताहरुले एमाले र माओवादी केन्द्र मिलेर बनेको पार्टी नेकपामाथि स्वदेशी तथा विदेशी प्रतिक्रियावादी शक्तिले हमला गरेकाले पार्टी एकताले पूर्णता पाउन नसकेको बताएका छन् ।

माओवादी केन्द्रका नेताहरुले संविधान निर्माण भएदेखि नै नेपालको संविधान, गणतन्त्र, समावेशी समानुपातिक, धर्मनिरपेक्षता लगायतप्रति असन्तुष्ट विदेशी पक्षले खेलेका कारण नेकपा एकताले पूर्णता नपाउँदै विभाजन हुन पुगेको पनि बताएका छन् ।

‘प्रतिगामी र बिसर्जनवादी कोणबाट पार्टीमा हमला भयो’ बैठकमा प्रवक्ता नारायणकाजी श्रेष्ठको भनाई उदृत गर्दै स्रोतले भन्यो, ‘प्रतिगामी कदम असफल पार्न हामीले संघर्ष गर्यौ । सर्वोच्च अदालतको पछिल्लो फैसला षड्यन्त्रको योजना अन्तर्गत नै भएको हो भन्ने हाम्रो ठहर छ ।’

बैठकमा बोल्दै एमाले र माओवादी केन्द्र मिलेर बनेको नेकपालाई अधिकांश नेताहरुले क्रान्तिकारी पार्टी बनाउन खोजेपनि केपी ओलीले क्रान्तिकारी पार्टी बन्ने देखेर लगातार आक्रमण गरेको नेताहरुले ब्रिफिङ गरेका छन् ।

नेताहरुले यस्तो आक्रमणले कम्युनिस्ट आन्दोलनको एकीकरण वा विकास र अग्रगमनको यात्रामा बाधामात्र नभएर घट्नाक्रमहरुले बैदेशिक हस्तक्षेपसँग पनि सम्बन्धित भएको पुष्टि गरेको बताएका छन् । ‘नेपालको सवै प्रक्रियामा आफ्नो स्वामित्व हुनुपर्छ भन्ने विदेशी शक्तिको चाहाना छ ।

बैठकमा ओली नेतृत्वको सरकार विस्थापन गर्न माओवादी केन्द्र एक्लैले गर्न नसक्ने भएकाले खासगरी नेपाली काँग्रेस र जसपासँग सहकार्य गर्न जरुरी रहेको पनि नेताहरुले बताएका छन् ।

ओलीविरुद्ध अविश्वासको प्रस्ताव लैजाउ भन्दा काँग्रेसले नमाने पनि अहिले काँग्रेस सकारात्मक भएको भन्दै सहकार्यका लागि जसपासँग पनि विभिन्न ढंगले कुराकानी र छलफल सकारात्मक ढंगले अघि बढिरहेको नेताहरुले बताएका छन् ।

बैठकमा प्रदेश इन्चार्जहरुले पार्टीको पछिल्लो अवस्थाबारे रिपोर्टिङ गरेका थिए । प्रदेशको रिपोर्टिङ गर्दै प्रदेश १ का सहइन्चार्ज सावित्रिकुमार काफ्लेले माओवादी केन्द्रका प्रदेश १ का २ जना एमालेतर्फ लागेको जानकारी गराएका थिए ।

त्यस्तै प्रदेश २ का विश्वनाथ शाहले ३ जना सांसद प्रभु साह, ज्वाला कुमारी साह र टेकबहादुर वलाम्पाकीबाहेक सवै केन्द्रीय सदस्य र सांसदहरु माओवादी केन्द्रमै रहेको रिपोर्टिङ गरेका थिए ।

वागमती प्रदेशका नारायण दाहालले प्रदेश सांसद दावा तामाङ, विष्णुलाल अधिकारी र कमल चौलागाईं बाहेक अन्य नेता माओवादीमै रहेको जनाएका थिए ।

गण्डकी प्रदेशका हितराज पाण्डेले स्याङजाका एक प्रदेश सांसदबाहेक कुनै पनि नेता एमालेतिर नलागेको बताएका थिए ।

लुम्बिनी प्रदेशका ओनसरी घर्तीले संघीय सांसद टोपबहादुर रायमाझी, चन्द्रबहादुर खड्का एमालेतिर लागेपनि अझैपनि माओवादी एक्लै चुनाव लडेपनि ४ निर्वाचन क्षेत्रमा चुनाव जित्ने र अरूसँग मिल्दा ८ वटा स्थानमा जित्न सकिने भन्दै प्रचण्डपथ हटाउनु गल्ती भएको बताइन् ।

कर्णाली प्रदेशका सचिव मायाप्रसाद आचार्यले एक सांसद एमालेतिर लागेपनि अन्य केन्द्रीय सदस्यहरु माओवादी केन्द्रमै रहेको बताए ।

सुदूररपश्चिम प्रदेशका सचिव नेपबहादुर चौधरीले १४ केन्द्रीय सदस्यमध्ये एकजना लेखराज भट्टमात्रै एमालेतिर लागेको जानकारी गराएका थिए ।

उपत्यका समन्वय समितिका तर्फबाट लीलामणि पोखरेल तथा सम्पर्क समितिका तर्फबाट प्रह्लाद बुढाथोकी र प्रवास कमिटीका तर्फबाट युवराज चौलागाईंले रिपोर्टिङ गरेका थिए ।

माओवादी केन्द्रको बैठक सोमबार ११ बजे पुनः बस्ने प्रवक्ता नारायणकाजी श्रेष्ठले जानकारी दिए । उनका अनुसार बैठकको कार्यसूची अनुसार केन्द्रीय कार्यालय र प्रदेशका तर्फबाट रिपोर्टिङ भएको भन्दै संगठनात्मक काम, पार्टीको विधान परिमार्जन, राष्ट्रिय भेला र विविध अन्तर्गतको कार्यसूची अनुसार छलफल सुरु भएको बताए ।