अखबार नेपाल ट्रेन्डिङ

काठमाडौं: केही दिनयता बढेको अत्यधिक गर्मीसँगै तातो हावाले दाङ, नेपालगञ्ज, विरगञ्ज, भैरहवा, जनकपुर सहित देशका विभिन्न स्थानको जनजिवन प्रभावित हुन थालेको छ । झण्डै १ महिना अघि बारा र पर्सामा आएको विनाशकारी हावाहुरी पिडितले पनि थप गर्मीको समस्या भोगिरहेका छन् ।

अत्यधिक गर्मीले बजार, शैक्षिक संस्था, सरकारी कामकाज समेत प्रभावित भएको छ । वीरगञ्जको तापक्रम ३७ देखि ४१ अर्थात् यस सिजनकै सबैभन्दा बढी डिग्री सेल्सियस मापन गरिएको छ । गर्मीका कारण पछिल्लो सातामा झाडापखाला,आउँ तथा भाइरल ज्वरोका बिरामीको चाप बढेको छ । अस्पतालमा बिरामीको घुँइचो बढ्न थालेको छ ।

एकमहिना अघि आएको विनाशकारी हावाहुरीबाट प्रभावित बारा,पर्साका नागरिक थप समस्यामा परेका छन । राहत स्वरुप पाएका टेन्टमा प्रचण्ड घाम र गर्मीका कारण उनीहरुको दैनिकी सकसपुर्ण बनेको छ । गर्मीकै कारण संक्रमण बढेपछि अस्पतालमा बिरामीको संख्या दिनप्रतिदिन बढ्दै गएको छ । तातो हावा मानव स्वास्थ्यका लागि जोखिमयुक्त हुने चिकित्सकले बताएका छन् । सुक्खा र तातो हावाका कारण बालबालिका बढी प्रभावित हुने भएकाले सजगता अपनाउन चिकित्सकको सुझाव छ ।

मध्य तथा सुदुर पश्चिमाञ्चल क्षेत्रीय हावापानी फिल्ड कार्यालय दाङले दाङ, नेपालगञ्ज, विरगञ्ज, भैरहवा.लगायत क्षेत्रमा तापक्रम अझै बढ्ने अनुमान गरेको छ । गत वर्षको तुलनामा यस वर्ष गर्मी अत्यधिक रेकर्ड गरिएको फिल्ड कार्यालयले जनाएको छ । अत्यधिक गर्मीले सरकारी कार्यालयमा सेवाग्राहीको संख्या कम देखिन थालेको छ भने स्थानीयको दैनिकी कष्टकर बन्दै गएको छ ।