अखबार नेपाल ट्रेन्डिङ

काठमाडौं: चिनियाँ कम्युनिस्ट पार्टीको प्रतिनिधि मण्डलले राष्ट्रपति विद्यादेवी भण्डारीलाई भेटेका छन् ।

राष्ट्रपति भवन शीतल निवासमा पुगेर नेपालमा रहेको प्रतिनिधि मण्डलले भण्डारीसँग साँझ ५ बजेदेखि ६ बजेसम्म भेट गरेको शीतल निवास स्रोतले जनाएको छ ।

भेटमा भएको छलफलबारे भने राष्ट्रपतिको कार्यालयले खुलाएको छैन ।

राष्ट्रपतिसँग एक घण्टा कुराकानी भएको शीतल निवासले जनाएको छ ।

यसैबीच प्रतिनिधि मण्डलले प्रधानमन्त्री केपी शर्मा ओलीसँग सोमबार भेट्ने भएको छ ।

आइतबार भेट्ने भनिए पनि समय नमिलेका कारण सोमबार मात्रै भेट हुने तय भएको जनाईएको छ ।

चिनियाँ कम्युनिस्ट पार्टीको अन्तर्राष्ट्रिय विभाग उपमन्त्री गुओ येझोउको नेतृत्वको चार सदस्यीय टोली आइतबार दिउँसो साढे १ बजे काठमाडौं आएको थियो ।

नेकपाभित्र विवाद चर्केको र संसद विघटन भएको अवस्थामा चिनियाँ पक्षको उच्चस्तरीय भ्रमण भएको हो ।

चीनियाँ टोलीले सरकार पक्षको भेटपछि मात्र अर्का अध्यक्ष पुष्पकमल दाहाल र माधव नेपालसँग भेट गर्ने बुझिएको छ ।

यसअघि चिनियाँ राजदूत हाउ यान्छी सक्रिय भएकी थिइन् ।

उनले राष्ट्रपति भण्डारी, पुष्पकमल दाहाल र माधव नेपालसँग भेट गरेकी थिइन् ।