अखबार नेपाल ट्रेन्डिङ

काठमाडौं: नेपाल कम्युनिस्ट पार्टी (नेकपा)ले ७७ वटै जिल्लाका अध्यक्ष र सचिवको टुंगो लगाएसँगै आज एकता घोषणा कार्यक्रम हुँदैछ । काठमाडौंस्थित प्रज्ञा भवन कमलादीमा हुने कार्यक्रम मध्यन्ह १२ बजेका लागि तय गरिएको छ ।

हिजो साँझ प्रधानमन्त्री निवास बालुवाटारमा बसेको बैठकले ७७ जिल्लाकै जिल्ला कमिटी अध्यक्ष र सचिवको टुंगो लगाएको हो । हिजो बिहान नेकपाका शीर्ष चार नेताले गरेको गृहकार्यपछि साँझ सचिवालय बैठक बसेको थियो । नेकपा प्रवक्ता नारायणकाजी श्रेष्ठका अनुसार हालसमम्म ७७ वटै जिल्लाको नेतृत्वको टुंगो लागेको छ । सचिवालय बैठकले जिल्ला अध्यक्ष र सचिवको नाम टुङ्गो लगाएको भए पनि जनवर्गीय संगठनको नेतृत्व र पोलिटब्युरो सदस्यको नामवली भने टुंगिन बाँकी रहेको जानकारी दिए ।

जिल्लाको नेतृत्व चयन गर्दा बैठकले यसअघि तत्कालिन नेकपा (एमाले)का जिल्ला अध्यक्ष हालको अध्यक्ष वा सचिवको जिम्मेवारीमा रहनेगरी पद विभाजन गरिएको छ । पार्टी अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले एकताका विषयमा सहमति गरेपनि वरिष्ठ नेता माधवकुमार नेपाल भने सन्तुष्ट थिएनन् । आफूलाई एक्ल्याउन खोजिएको भन्दै नेता नेपालले असन्तुष्टि राखेपछि गएको ४ दिनदेखि तीनै जना नेताहरु बीच छलफल चलेको थियो । अन्ततः नेपालकै मतमा पार्टीका दुबै अध्यक्ष उभिएपछि जिल्लातर्फको एकता प्रकृयाले पनि मुर्तरुप पाएको हो ।