अखबार नेपाल ट्रेन्डिङ

काठमाडौं: राष्ट्रपति विद्यादेवी भण्डारीले न्याय परिषदले सिफारिस गरेका पाँच जनालाई सर्वोच्च अदालतको न्यायाधीश नियुक्त गर्नुभएको छ । संसदीय सुनुवाइ समितिबाट नाम अनुमोदन भएपछि उनीहरुलाइ राष्ट्रपतिले संविधानको धारा १ सय २९ को उपधारा (२) बमोजिम सर्वोच्च अदालतको न्यायाधीश नियुक्त गर्नुभएको हो ।

न्यायाधीश नियुक्त हुनेमा प्रकाशकुमार ढुंगाना, सुष्मलता माथेमा, कुमार रेग्मी, हरिप्रसाद फुयाँल र डा. मनोजकुमार शर्मा रहेका छन् । ढुंगाना र माथेमा उच्च अदालतका मुख्य न्यायाधीश हुनुहुन्थ्यो भने रेग्मी, फुँयाल र शर्मा कानून व्यवसायी मध्येबाट न्यायाधीश सिफारिस हुनुभएको हो ।

यसैबीच २०७५ चैत १० गतेदेखि नेतृत्वविहिन बनेको निर्वाचन आयोगमा संघीय मामिला तथा सामान्य प्रशासन मन्त्रालयका सचिव दिनेश थपलिया प्रमुख निर्वाचन आयुक्त नियुक्त भएका छन् । यसैगरि राष्ट्रिय समावेशी आयोगको सदस्यमा विष्णुमाया ओझा नियुक्त भएका छन् ।