अखबार नेपाल ट्रेन्डिङ

काठमाडौं: तीन नम्बर प्रदेश सरकारले आफ्नो छुट्टै मेडिकल कलेज सञ्चालन गर्न आवश्यक विधेयक प्रदेशसभामा पेश गरेको छ । सामाजिक विकास मन्त्री युवराज दुलालले मंगलबार पेश गरेको मदनकुमार भण्डारी स्वास्थ्य विज्ञान प्रतिष्ठान सम्बन्धि व्यवस्था गर्न बनेको विधेयकमा प्रतिष्ठानले स्वास्थ्य सम्बन्धि बिभिन्न तहको पढाई गराउन सक्ने उल्लेख छ ।

विधेयक पारित भएपछि नेपाल सरकारले तीन सय बेडको क्षेत्रीय अस्पताल बनाउन निर्णय गरेको हेटौंडा अस्पताल अब मदनकुमार भण्डारी स्वास्थ्य विज्ञान प्रतिष्ठानमा परिणत हुनेछ । प्रदेश सरकार मातहत आएको उक्त अस्पताललाई प्रतिष्ठानमा परिणत गर्न तीन नम्बर प्रदेश सरकारले विधेयक प्रदेशस सभामा पेश गरेको हो ।

विधेयक पारित भएसँगै हेटौंडा अस्पताल अन्तर्गत गठन भएको समितिको खारेजी तथा हेटौंडा अस्पतालको चल अचल सम्पत्ति, लेनदेन, ऋण धन लगायत सबै कारोबार र कर्मचारी प्रतिष्ठानमा सर्ने उल्लेख छ । प्रतिष्ठानले स्वास्थ्य सम्बन्धि बिभिन्न तहको अध्यापन गराउनेछ । प्रतिष्ठानको कुलपति मुख्यमन्त्री, सहकुलपति सामाजिक विकास मन्त्री र पुरा समय काम गर्ने गरी उपकुलपति नियुक्त गर्न सक्ने उल्लेख छ ।

न्युन लागतमा गुणस्तरीय स्वास्थ्य क्षेत्रको जनशक्ति उत्पादन र गुणस्तरीय तथा सर्भसुलव स्वास्थ्य सेवा उपलब्ध गराउन प्रतिष्ठान स्थापनको लागि विधेयक ल्याइएको सामाजिक विकास मन्त्री युवराज दुलालले बताए ।