अखबार नेपाल ट्रेन्डिङ

काठमाडौं: नेपाल कम्युनिस्ट पार्टी (नेकपा)को स्थायी कमिटी बैठक आज बस्दै छ ।

प्रधानमन्त्री एवं पार्टी अध्यक्ष केपी शर्मा ओली र कार्यकारी अध्यक्ष पुष्पकमल दाहाल प्रचण्डबीच भएको सहमति अनुसार लामो समयदेखि अवरुद्ध स्थायी कमिटी बैठक बस्न लागेको हो ।

प्रधानमन्त्री निवास बालुवाटारमा बिहान ११ बजेदेखि बैठक सुरु हुने प्रधानमन्त्रीको सचिवालयले जनाएको छ ।

साउन १३ गते स्थगित भएको बैठक भदौ २६ गते अर्थात् आजका लागि बोलाउने सहमति भएको थियो ।

पार्टी एकताका बाँकी रहेका कामहरू आगामी असोज महिनाभित्र सम्पन्न गर्ने, आगामी कात्तिक १५ देखि १७ गतेसम्म केन्द्रीय कमिटी बैठक आयोजना गर्ने, मन्त्रिपरिषद् पुनर्गठन गर्दा निश्चित मापदण्ड तय गर्नुपर्ने प्रस्तावहरू तय गरिएका छन् ।

अमेरिकाको मिलेनियम च्यालेञ्ज कर्पेरेसनबीच भएको मिलेनियम च्यालेञ्ज कम्प्याक्ट सम्झौता (एमसिसी) परिमार्जन र संशोधन गरेर पारित गर्नुपर्ने पनि स्थायी कमिटी बैठकका लागि प्रस्ताव तय गरिएको छ ।