पत्रकारदेखि स्वास्थ्यकर्मीसम्मको नक्कली परिचयपत्र !
वि.सं.२०७७ भदौ २३ मंगलवार १५:४४
काठमाडौं: विश्वभर महामारीको रुप लिएको कोरोना भाइरस संक्रमणकालिन अवस्थामा छौं अहिले हामी । हाल उपत्यकाका तीन वटा जिल्ला लगायत अन्य केही जिल्लाहरुमा पनि निषेधाज्ञा जारी छ ।
उपत्यकाका तीन जिल्लामा निषेधाज्ञाको बेला पत्रकार, स्वास्थ्यकर्मी, बैकर्स लगायत अत्यावश्यक सेवा कार्यमा संलग्न आम नागरिकलाई सरकारले हिँड्डुलमा कतै रोक लगाएको छैन । पत्रकार तथा स्वास्थ्यकर्मीहरुले कार्यालयकै परिचयपत्र बोकेर सजिलै हिँड्डुल गर्न पाउने सरकारले निर्णय नै गरेको छ ।
कोरोना महामारीकाबीच कतिपय मिडिया हाउसका पत्रकारहरु यतिबेला रोजगारी गुमाएर बेरोजगार भई घरमा थन्किएर बस्न बाध्य भएका बेला पछिल्लो समय उपत्यकामा प्रेस लेखिएको गाडी तथा मोटरसाईकलहरु जताततै गुडिरहेको देख्न सकिन्छ ।
के सडकमा प्रेस लेखेको ज्याकेट र परिचय पत्र बोक्ने सबै पत्रकार नै हुन् त ? तरपनि सडकमा प्रेस लेखेको गाडी दिनप्रतिदिन गुडि नै रहेको देखिन्छ । यसरी उपत्यकामा प्रेस लेखिएका गाडी तथा मोटरसाईकलहरु गुडिरहेका बेला केही दिन अगाडि मात्र नेपाल पत्रकार महासंघले समेत चासो दिएर विज्ञप्ती जारी गरेको थियो ।
पछिल्लो समय प्रेस कार्डको दुरुपयोग बढेको खबर प्राप्त भएपछि सम्बन्धित जिल्लाको शाखालाई समेत अनुगमन गर्न निर्देशन दिएको पत्रकार महासंघका अध्यक्ष गोविन्द आचार्यले बताए ।
यसैबीच सोमबार महानगरीय अपराध महाशाखाको टोलीले नक्कली प्रेस परिचय पत्र र प्रेसको नाममा धन्दा चलाईरहेका केहि प्रिन्टिङ प्रेसको परिचय बनाउँदै बिक्री गर्ने तीन जनालाई राजधानीको मुटु मानिने बागबजारबाट पक्राउ गरेको छ ।
प्रहरीले छापा मार्ने क्रममा बागबजरबाट कालिका प्रिन्टिङ सपोर्टका सञ्चालक सहित तीन जनालाई पक्राउ गरेको छ । उनीहरुले एउटा कार्ड बनाए बराबर ५०० रुपैयाँ लिने गरेको प्रहरीले जानकारी दिएको छ ।
पक्राउ परेका उनीहरुले होम डेलिभरीसम्मको सेवा दिने गरेको प्रहरी समक्ष बयान दिएका छन् । प्रेस र स्वास्थ्कर्मीको नक्कली कार्ड बनाएर बेच्ने गरेको सूचनाका आधारमा प्रहरी छापा मार्न बागबजार पुगेको थियो ।
निषेधाज्ञको समयमा प्रेस लेखेको सवारी साधनलाई सुरक्षाकर्मीले नरोक्ने भएका कारण प्रेस कार्डको दुरुपयोग बढ्दै गएको छ । यसरी पत्रकारकै कार्ड देखाएर खुलेआम अवैध धन्दा समेत हुने भएकोले त्यसको नियन्त्रणका लागि सम्बन्धित निकायले समयमै ध्यान दिएर कारबाहीको दायरामा ल्याउन जरुरी देखिएको छ ।
वि.सं.२०७७ भदौ २३ मंगलवार १५:४४