नेपाल पत्रकार महासंघद्वारा सवारी साधनमा प्रेस लेखेर दुरुपयोग भएकोप्रति गम्भीर ध्यानाकर्षण
वि.सं.२०७७ भदौ १५ सोमवार २३:५९
काठमाडौं: सञ्चारकर्मीको परिचय दिई सवारी साधनमा प्रेस लेखेर दुरुपयोग भएकोप्रति नेपाल पत्रकार महासंघले गम्भीर ध्यानाकर्षण गराएको छ ।
जनतालाई सूसुचित गराउने प्रयोजनका लागि दिइएको सुविधालाई कसैले पनि दुरुपयोग गर्नु गम्भीर आपत्तिको विषय हो । यस्ता दुरुपयोगले पत्रकारिता पेशाको प्रतिष्ठा र मर्यादामा आँच पुग्ने महासंघको ठहर रहेको उल्लेख छ ।
कोरोना भाइरस संक्रमण नियन्त्रणका लागि सरकारले जारी गरेको निषेधाज्ञाका क्रममा देशका विभिन्न ठाउँमा सञ्चार क्षेत्रको परिचयपत्र दुरुपयोग भएकोप्रति महासचिव रमेश विष्टद्वारा जारी विज्ञाप्तिमा उल्लेख गरिएको छ ।
महासंघ पत्रकारिता पेशाभन्दा बाहिरका व्यक्तिहरुलाई आफ्नो सवारी साधनमा प्रेस लेखेर हिँडडुल नगर्न आग्रह गरेको छ । आम सञ्चारकर्मी र सञ्चार प्रतिष्ठनलाई पनि पेशागत कर्मका समयमा मात्रै प्रेस उल्लेख गरिएको सवारी साधन प्रयोग गर्न, आफन्त वा साथीभाइलाई प्रेस पास नदिन र प्रेस पासको दुरुपयोग हुन नदिन सचेत रहन महासंघले आग्रह गरेको छ ।
प्रेस पासको दुरुपयोग रोक्न महासंघले नेपाल प्रहरी लगायतका सम्बन्धित निकायहरुलाई हार्दिक आग्रह गर्दै प्रेस उल्लेखित सवारी साधनमा सवार सबै यात्रुको प्रेस पास चेकजाँच गर्न, प्रेस पास अधिकारिक भए नभएको निश्चित गर्न र सम्बन्धित व्यक्ति पत्रकारिताको पेशागत जिम्मेवारीमा हिँडेको वा नहिँडेको निश्चित गर्न महासंघ महानगरिय ट्राफिक प्रहरी कार्यालय सहितका सम्बन्धित निकायलाई हार्दिक आग्रह गरेको छ ।
वि.सं.२०७७ भदौ १५ सोमवार २३:५९