अखबार नेपाल ट्रेन्डिङ

काठमाडौं: नेपालमा आएको सलह किराको बथान सक्रिय भएकाले त्यसको गतिविधि निगरानी गर्न नेपाल सरकारले संयुक्त राष्ट्र संघ र भारतीय अधिकारीहरुसँग समन्वय गरि नियन्त्रण गरिने कृषिमन्त्री घनश्याम भुसालले बताएका छन् ।

सलह पुगेको जिल्ला, त्यसले पुर्याएको क्षति र सम्भावित जोखिम लगायतका विषयमा विस्तृत विवरण लिई मन्त्रालयले गृह र विपद व्यवस्थापन समितिसँग समन्वय गरी सलह नियन्त्रण गर्न विषादी छर्किने भए ड्रम, ट्यांकर लगायतको व्यवस्थापन गरि बजेट व्यवस्थापनका लागि सचिव राजेन्द्रप्रसाद भारीलाई अन्तरमन्त्रालयमा समन्वय गर्न निर्देशन दिएको मन्त्री भुसालले जानकारी दिए ।

करिब ८ देखि १० करोडको संख्यामा उड्ने सलह नेपालमा दुई देखि चार लाखको समुहमा मात्रै भित्रिएको र वयस्क सलह अण्डा पार्न नपाए बढीमा दुई हप्तासम्म मात्र बाँच्न सक्ने भएकाले एक महिनासम्म बाँच्न सक्ने अनुमान गरिएको छ । साँझ एक ठाउँमा भेला भएर बस्ने अनि बिहान ८/९ बजेपछि मात्रै बाली खान खेतमा पस्ने भएकाले सबेरै ५/६ बजेको समयमा किसानहरुले विषादी प्रयोग गर्ने, धुँवा लगाउने, ड्रम बजाउने जस्ता कार्य गरेर नियन्त्रणमा लिन सकिने भएकोले अहिले डराउनु नपर्ने अवस्था रहेको कृषि विभागका पूर्व महानिर्देशक डा. डिल्लीराम शर्माले बताए ।