अखबार नेपाल ट्रेन्डिङ

काठमाडौं: शनिबार तराईका विभिन्न जिल्ला हुँदै नेपाल प्रवेश गरेको सलह किरा नियन्त्रणका लागि प्रदेश सरकारका साथै स्थानिय सरकारले सलह किरा संकलन गरेर ल्याउनेलाई प्रोत्सहान स्वरुप रकम उपलब्ध गराउने निर्णय गरेका छन् ।

विभिन्न जिल्लामा सलह देखा परेसँगै प्रदेश नम्बर ५ को भूमि व्यवस्था मन्त्रालयले किसानले सलह जम्मा गरेर स्थानीय तह मार्फत वडा कार्यालयमा ल्याएमा प्रोत्सहान स्वरुप प्रतिकिलो २० रुपैयाँका दरले नगद उपलब्ध गराउने निर्णय गरेको मन्त्रालयका सचिव तेज बहादुर सुवेदीले जानकारी दिएका छन् ।

यता प्रदेश नम्बर २ रुपन्देहीकै कञ्चन गाउँपालिकामा सलह देखा परेसँगै सलह किरा नियन्त्रणका लागि गाउँपालिकाका अध्यक्ष गोकर्णबहादुर क्षेत्रीले सलह किरा संकलन गरेर ल्याउनेलाई प्रोत्सहान स्वरुप प्रतिकिलो ३० रुपैयाँ उपलब्ध गराउने बताएका छन् ।

त्यस्तै, सलह किरा देखिएमा कृषि विकास शाखा, सम्बन्धित वडा कार्यालय, कृषि ज्ञान केन्द्र, कृषि विकास निर्देशनालय, कृषि विकास मन्त्रालयमा सम्पर्क गर्न अनुरोध गर्नका साथै तरकारी बाली, धानको बिउ तथा अन्य बालीहरुको बचावटका लागि झुल वा जालीको प्रयोग गर्ने र आसपासका क्षेत्रहरुमा ठुलो ध्वनि, धुँवाको प्रयोग गर्दै मेथानोल ३ एम एल, १ लिटर पानीमा वा क्लोरोपाइरिफस विषादी २ एमएल प्रति लिटर पानीमा घोली किरामा पर्ने गरी स्प्रे गर्न मन्त्रालयले अनुरोध गरेको छ ।