अखबार नेपाल ट्रेन्डिङ

काठमाडौं: प्रधानमन्त्री केपी शर्मा ओलीले जारी लकडाउनको विषयमा आज दिउँसो ४ बजे बालुवाटारमा विभिन्न क्षेत्रका विज्ञहरुसँग छलफल गर्ने भएका छन् । कोरोना रोकथाम तथा नियन्त्रणका लागि प्रभावकारी भएको लकडाउन लम्बिन थालेपछि लकडाउनको मोडालिटी परिवर्तन गर्न र आर्थिक गतिविधि सुरु गर्न सरकारमाथि दबाब परिरहेको छ ।

प्रधानमन्त्री ओलीले स्वास्थ्य, आर्थिक र सामाजिक क्षेत्रका २५ जना विज्ञलाई छलफलका लागि बालुवाटार डाकेको स्रोतले जनाएको छ । विज्ञहरुको छलफलपछि मात्रै लकडाउनको मोडालिटीबारे निर्णय लिइने स्रोतको दाबी छ । सरकारले कोरोना भाइरस नियन्त्रणका लागि गत चैत्र ११ गतेदेखि जारी गरेको लकडाउन जेठ ३२ गतेसम्म बढाएको छ । लकडाउन बढाए पनि नेपालमा कोरोना संक्रमितहरुको संख्या दिन प्रतिदिन बढिरहेको छ ।