अखबार नेपाल ट्रेन्डिङ

काठमाडौं: पत्रकार दीपक पाठकलाई रिहा गर्न नेपाल पत्रकार महासंघले माग गरेको छ । महासंघको काठमाडौं शाखाले पत्रकार पाठकलाई प्रहरीले पक्राउपछि गुपचुप रुपमा विद्युतीय कारोबार सम्बन्धि अभियोग लगाएको प्रति आपत्ति जनाउँदै अविलम्ब रिहाईका लागि माग गरेको हो ।

महासंघको काठमाडौं शाखाका सदस्य, केन्द्रीय पार्षद, रेडियो नेपालका बोर्ड सदस्य र मार्गदर्शन न्युज डटकम अनलाइन पोर्टलका सम्पादकसमेत रहेका पत्रकार पाठकलाई सामाजिक सञ्जालमा स्टाटस पोस्ट गरेको कारण त्यस्तो अभियोग लगाएकोप्रति आफ्नो गम्भिर ध्यानाकर्षण भएको काठमाडौं शाखाले जनाएको छ । प्रहरीले पाठकलाई बिहीबार कोटेश्वरस्थित निवासबाटै प्रक्राउ गरी गुपचुप ढंगले विद्युतीय कारोबारको अभियोग लगाएको बुझिन आएको महासंघद्वारा जारी विज्ञप्तीमा उल्लेख छ ।

महासंघले कोही कसैको मयार्दामा आँच आउने किसिमको अभिव्यक्ति फेसबुक स्टाटसबाट भएको छ भने पनि सरोकारवाला निकायको समन्वय र रोहबरमा आगामी दिनमा त्यस्ता गल्ति नदोहो-याउने प्रतिवद्धताका आधारमा पत्रकारका हकमा प्रहरीले रिहा गरेका घटना प्रशस्त रहेको तर पत्रकार पाठकलाई भने लामो समयदेखि लकडाउनको असरले विषयान्तर गरी अभियोग लगाउन खोजिएको आरोप लगाएको छ ।

काठमाडौं शाखाले आफूहरु पत्रकारलाई राहत तथा अन्य उद्धारका कार्यमा केन्द्रीत भइरहेको बेला अकस्मात कसैलाई थाह नदिई पत्रकारलाई हिरासतमा लिनु, पक्राउ गर्नुअघि नै २ दिनको म्याद थपिनु र हतासमा मुद्दा चलाउने प्रयास गरिनुजस्ता घटना पुर्वाग्रही, पुर्वनियोजित र षड्यन्त्रमुलक भएको स्पष्ट पारेको छ ।