अखबार नेपाल ट्रेन्डिङ

काठमाडौं: कोरोना भाइरस महामारी रोकथामको लागि नेपाल सरकारले गरेको लक डाउन नीतिको कारण असहाय, अपांग, फरक क्षमता भएका व्यक्तिहरू तथा ज्यालादारी गरी गुजारा चलाउने व्यक्तिहरु समस्यामा पर्न गई दैनिक खाना खान समेत मुस्किल परेको बेला महानगरीय प्रहरी कार्यालयको बिशेष पहल एवं बिभिन्न बैंकहरुसँगको सहकार्यमा निशुल्क खाद्य सामाग्री वितरण अभियान भईरहेको छ ।

अभियान अन्तर्गत चौथो दिन सुनगाभा वाटिका नेपाल कालोपुलमा रहेका २०० जना, उज्यालो नेपाल, कुमारीगालमा रहेका ४० जना, हाम्रो सुनौलो संसार गोकर्णेश्वर जोरपाटीमा रहेका १४ जना, सोलु बालगृह कल्याण अनाथालय संस्था गोकर्णेश्वरमा रहेका १० जना वालबालिका यसै गरी केयर वालगृहमा १५ जना, महिला बालवालिका उत्थानकेन्द्र वुढानिलकण्ठमा रहेका १० जान र महानगरीय प्रहरी कार्यालयको हटलाईमा फोन सम्पर्क गर्ने दैनिक ज्यालादारी मजदुरहरु १९ जनालाई समेत महानगरीय प्रहरी कार्यालयका प्रमुख विश्वराज पोखरेलको उपस्थितमा अत्यावश्यक खाद्य सामाग्री वितरण गरिएको छ ।

मुलुक लकडाउनको यस बिषम् परिस्थितिमा भोको पेटकै कारण सिर्जित हुन सक्ने बिभिन्न अपराधहरु (चोरी, डकैति, हत्या, हिंसा, ठगी) रोकथाम तथा नियन्त्रणका साथै मानव सेवाको यस अभियानलाई लक डाउन अवधिभर विहान ९ बजे देखि साँझ ६ बजे सम्म निरन्तर संचालन गरिने समेत महानगरीय प्रहरी कार्यालयका प्रमुख विश्वराज पोखरेलले बताए । साथै यस अवधिभर उपत्यकामा अवस्थित कोहि कसैले खाद्य सामाग्री अभाव भएमा नजिकको प्रहरी कार्यालय वा महानगरीय प्रहरी कार्यालयको हटलाईन नम्बर १०० मा फोन गरी आफ्नो गुनासो टिपाउन समेत प्रहरी नायव महानिरीक्षक विश्वराज पोखरेलले अनुरोध गरे ।