अखबार नेपाल ट्रेन्डिङ

भक्तपुरः नगरकोटमा एशियाकै दोस्रो र नेपालकै पहिलो लामो जिपलाईन सञ्चालनमा आएको छ । उक्त जिपलाईन करिव पाँच करोड लगानीमा नगरकोट जिपलाईन प्रा.लि. ले निर्माण गरेको हो ।

शुक्रबार एक कार्यक्रमकाबीच संस्कृति, पर्यटन तथा नागरिक उड्डयनमन्त्री सुदन किराँतीले रिबन काटेर जिपलाईनको उद्घाटन गरे । मन्त्री किरातीले विश्व सम्पदा सूचीमा रहेको चाँगुनारायण क्षेत्रमा जिपलाईन खुल्नु निकै राम्रो कुरा भएको बताए । उनले भने- ‘मैले जहिले पनि नेपालको पर्यटन स्थानीय बासिन्दाको स्वाद र स्वामित्वसहितको हुनुपर्ने भन्दै आएको छु । नेपालको पर्यटन कल्चर, नेचर र एडभान्चर हो । यसरी विश्व सम्पदा सूचीमा रहेको चाँगुनारायण क्षेत्रमा जिपलाईन खुल्नु निकै राम्रो कुरा हो ।’ नेपालको पर्यटनले गति लिइरहेको समेत उनले बताए । ‘नेपालको पर्यटनले आङ्ग तन्काएको छ । जुन निकै राम्रो कुरा हो । यो जिपलाईनले पनि पर्यटन विकासमा टेवा पुर्याउनेछ ।’

जिपलाईन चाँगुनारायण नगरपालिकास्थित वडा नं. ६ र ७ मा फैलिएको २ हजार २५० मिटर लम्बाईमा बनेको छ । साहसिक पर्यटन अन्तर्गत जिपलाईन निर्माणको लहर बढिरहेको बेला नगरकोटमा हालसम्मकै सबैभन्दा लामो जिपलाईन निर्माण गरी सुरु गरिएको सञ्चालक केदार थापाले जानकारी दिए ।  सूर्योदय र सूर्यास्त हेर्न नगरकोट पुग्ने पर्यटकलाई थप नयाँ गन्तव्यका रूपमा जिपलाईन सञ्चालन गरिएको सञ्चालक थापाको भनाई छ ।

नेपालीलाई जिपलाईन चढ्न प्रतिव्यक्ति ४ हजार ५०० रुपैयाँ तिर्नुपर्नेछ भने विदेशीका लागि प्रति व्यक्ति ५० अमेरिकी डलर तिर्नुपर्ने कम्पनीले जनाएको छ । यसअघि पोखराको जिपलाइन नेपालकै सबैभन्दा लामो जिपलाइनका रूपमा स्थापित थियो ।

नगरकोटमा अन्तर्राष्ट्रिय पर्यटक जमघट समेत हुने भएकाले यसलाई विशेष महत्वका साथ हेरिएको छ ।  पर्यटकीयसँगै एडभेन्चर टुरिज्मले समेत नगरकोटलाई परिचित गराउने मुख्य उद्देश्य रहेको सञ्चालक थापाले बताए । थापाले धुलिखेलमा पनि धुलिखेल जिपलाईन सञ्चालन गरिरहेका छन् ।