अखबार नेपाल ट्रेन्डिङ

काठमाडौं:  किसानले असारमा धान रोप्ने समयमा रासायनिक मल पाउने भएका छन् । कृषि सामग्री कम्पनीले पर्याप्त मल मौज्दात रहेको भन्दै अभाव नहुने जनाएको हो ।

कम्पनीको भण्डारमा यूरिया, डिएपी र पोटास मल पर्याप्त मात्रामा रहेको छ । पर्याप्त मात्रामा रासायनिक मल भण्डारणमा भएपनि ढुवानीमा समस्या भएको मल खरिद बिक्रीको जिम्मा पाएको कृषि सामग्री कम्पनीले जनाएको छ ।

दोस्रो लहरको कोरोना संक्रमणलाई ध्यानमा राख्दै गत वैशाखदेखि देशका अधिकाशं जिल्लामा लागू गरिएको निषेधाज्ञाका कारण मलको ढुवानी हुन नसक्दा अभाव हुनसक्ने देखिएको कम्पनीले जनाएको छ ।

कृषि सामग्री कम्पनीसँग हाल १७ हजार टन युरिया मौज्दात रहेको छ । थप ५० हजार टन युरिया मल भदौमा आइपुग्ने कम्पनीले जनाएको छ । कम्पनीको तथ्यांक अनुसार धान रोप्ने समय जेठ असार र साउनमा करिब एक लाख टन मलको माग हुने गरेको छ ।

कम्पनीको भण्डारमा बिहीबारसम्मको तथ्यांक अनुसार १७ हजार १ सय ३५ मेट्रिक टन युरिया, ३३ हजार ५ सय ५७ मेट्रिक टन डिएपी र ३ हजार ५ सय ९० मेट्रिकटन पोटास मौज्दात रहेको छ ।

यस्तै, बंगलादेखबाट खरिद गरिएको ५० हजार टनमध्ये १९ हजार ५ सय टन हाराहारीको मल असार १५ गतेभित्र आइसक्ने अनुमान गरिएको छ । बोलपत्र मार्फत खरिद गरिएको ५० हजार मेट्रिक टन युरिया आयातको क्रममा रहेको छ ।

कम्पनीले ग्लोबल टेन्डरमार्फत चीनबाट ल्याउन लागेको ३० हजार टन युरिया मल बीचबाटोमा आइपुगेको छ । नेपालमा रोपाइँ हुने क्षेत्रफलका आधारमा करिब साढे ७ लाखदेखि ८ लाख टन मल आवश्यक पर्छ । जसमध्ये साढे पाँच लाख टन आयात गर्न सके किसानले अभाव झेल्नु पर्दैन ।

सरकारले चालु आर्थिक वर्ष २०७७/०७८ का लागि मल खरिद गर्न ११ अर्ब रुपैयाँ बजेट विनियोजन गरेको थियो । उक्त बजेटबाट करिब पाँच लाख टन (युरिया मल २ लाख ८२ हजार ५ सय, डीएपी २ लाख २ हजार ५ सय र पोटास १५ हजार) आयात गर्ने जनाएको छ ।

यो पनि पढ्नुहोस् :

नेपाल राष्ट्र बैंकले बैंक तथा वित्तय संस्थाहरुलाई नयाँ निर्देशन जारी