अखबार नेपाल ट्रेन्डिङ

काठमाडौँ : मध्य बानेश्वरस्थित ग्लोबल आईएमई बैंकका सुरक्षा गार्डमाथि दिउसै खुकुरी प्रहार भएको छ । सुरक्षा गार्ड रुद्र बहादुर गुरुङले नै बोकेको खुकुरी अपरिचित व्यक्तिले झिकेर उनैलाई प्रहार गरेको हो ।

खुकरी प्रहार गरेलगत्तै सुरक्षा गार्ड भुइँमा लड्न पुगे भने ती अपरिचित ब्यक्ति फरार भएका छन् ।

प्रहरीका अनुसार आज बिहीबार बैंकमा पैसा साट्न लाइनमा बस्दा विवाद भएपछि सुरक्षा गार्डले बोकेको खुकुरी खोसेर गार्डमाथि नै खुकुरी प्रहार गरेको महानगरीय प्रहरी वृत्त, बानेश्वरका प्रहरी प्रमुख डीएसपी दक्ष बस्नेतले जानकारी दिएका छन् ।

घाईते गुरुङको हाल काठमाडौँ मेडिकल कलेजमा उपचार भइरहेको छ । खुकुरी प्रहार गर्ने व्यक्ति फरार रहेकाले खोजीकार्य भइरहेको प्रहरीले बताएको छ ।