अखबार नेपाल ट्रेन्डिङ

काठमाण्डौं:  नेपालको सबैभन्दा ठूलो इन्टरनेट सेवा प्रदायक वर्ल्डलिंक कम्युनिकेसन लिमिटेडले फेसबुकसँग साझेदारी गरेको छ। वर्ल्डलिंकले आफ्नो प्रयोगकर्तालाई छिटो, किफायती र भरपर्दो वाईफाई सेवाका लागि फेसबुक कनेक्टिभिटी (जडान) गर्न साझेदारी घोषणा गरेको हो।

वर्ल्डलिंकले सन् २०१८ देखि १० हजार सार्वजनिक ठाउँमार्फत ५ लाखभन्दा बढी ग्राहकलाई निःशुल्क वाईफाई सेवा दिईरहेको छ । वर्ल्डलिंकका अनुसार एक्सप्रेस वाईफाईले वर्ल्डलिंकको नेपालभर अवस्थित १० हजार वाईफाई हटस्पटमध्य ७ हजार ५ सय वाईफाई हटस्पटलाई सहयोग र बलियो बनाउनेछ।

यो सेवाले निम्न वर्ग र कनेक्सन कम भएको ठाउँमा वाईफाई सर्भिस सञ्चालन गर्न सहयोग गर्ने र यसलाई दिर्घकालिन योजनाका रुपमा अगाडि बढाउन फेसबुकसँग सहकार्य गरेको कम्पनीले जनाएको छ। सहकार्यसँगै वर्ल्डलिंक नेपालभर सार्वजनिक क्षेत्रमा इन्टरनेट सेवाहरुको दिगो विस्तार गर्नका लागि अझ सबल बनेको छ।

सन् २०३३ सम्ममा मुलुकमा ३० हजार ठाउँमा सार्वजनिक वाईफाई सञ्चालन गर्ने योजना वर्ल्डलिंकको छ। साझेदारीका माध्यमबाट वर्ल्डलिंकले फेसबुक कनेक्टिभिटीको एक्सप्रेसको प्लेटफर्ममार्फत नेपालको वाईफाईको वर्तमान अवस्थामा अझ सुधारका लागि निर्माण, सञ्चालन र वृद्धिका लागि सहयोग गर्ने जनाएको छ।

सन् १९९५ मा सुरु भएर दुई वर्षपछि इमेल, १९९९ मा भिस्याट हुँदै सन् २००० देखि काठमाण्डौं बाहिरबाट समेत इन्टरनेट सेवा अघि बढाएको वर्ल्डलिंक सुचना प्रविधि क्षेत्रमा सबैभन्दा बढी कर तिर्ने करदाता कम्पनी र सबैभन्दा धेरै रोजगारी दिने कम्पनी हो। मुलुकमा खपत हुने कुल ब्यान्डविथमध्ये ४३ प्रतिशत हिस्सा ओगेटेको वर्ल्डलिंक  आर्थिक वर्ष २०७६/७७ मा १० औं ठूलो करदाता कम्पनी पनि हो।