अखबार नेपाल ट्रेन्डिङ

काठमाडौं: वाग्मती प्रदेश मदन भण्डारी स्वास्थ्य विज्ञान प्रतिष्ठान अन्तर्गतको हेटौँडा अस्पतालले पाँच दिनमा १ सय २० शैयाको सुविधा सम्पन्न आइसोलेसन वार्ड स्थापना गरेको छ ।

अस्पतालले हेटौँडा उपमहानगरपालिकासँग समेत सहकार्य गरेर हेटौँडा–६ स्थित गौरीटार रङ्गशालामा रहेको छात्रावास भवनमा आइसोलेसन वार्ड सञ्चालनमा ल्याएको हो ।

लिसा हिमालयन इभीको सहयोगमा सामाजिक विकास मन्त्रालय, हेटौँडा अस्पताल र उपमहानगरको संयुक्त टोलीले पाँच दिनमा १ सय २० शैयाको वार्ड तयार पारेको अस्पतालले जनाएको छ ।

वाग्मती प्रदेश कोभिड सङ्कट व्यवस्थापन समितिको बैठकमा विद्यालयबाट आइसोलेसन तथा क्वारेन्टिन हटाउन भएको निर्णय कार्यान्वयन गर्न आइसोलेसन वार्ड स्थापना गरिएको हेटौँडा अस्पताल व्यवस्थापन समितिका अध्यक्ष प्रकाश पौडेलले जानकारी दिए ।

नवनिर्मित आइसोलेसन वार्डमा शुक्रबार साँझदेखि नेपाल प्रहरीका नौ सहित १२  कोरोना सङ्क्रमितलाई राखि आवश्यक उपचार प्रक्रिया शुरु गरिएको  वार्ड प्रमुख डा सागर काफ्लेले जानकारी दिए।

आइसोलेसन वार्ड क्षेत्र परिसरमा नेपाली सेना, नेपाल प्रहरी र सशस्त्र प्रहरीलाई सुरक्षाका लागि खटाइएको पौडेलले जानकारी दिए ।