अखबार नेपाल ट्रेन्डिङ

भैरहवा: भैरहवा (रुपन्देही)मा निर्माण भइरहेको राष्ट्रिय गौरवको आयोजनामध्ये गौतमबुद्ध अन्तराष्ट्रिय विमानस्थललाई निकै चासोको रुपमा हेर्ने गरिन्छ । यो विमानस्थलको भौतिक संरचना निर्माण लगभग–लगभग सकिएको छ । विमानस्थलमा बत्ती, उपकरण जडानलगायतका केही प्राविधिक काम मात्रै बाँकी रहेको छ । अहिलेसम्मको अवधिमा लगभग ९३ प्रतिशत भौतिक प्रगति र ६४ प्रतिशत वित्तिय प्रगति भएको जानकारी दिइएको छ ।

विमानस्थलको निर्माण एशियाली विकास बैकंको सहुलियत ऋणमा चिनियाँ कम्पनी नर्थवेस्ट सिभिल एभिएसन कन्स्ट्रकसन ग्रुपले गरिरहेको छ । यो विमानस्थल निर्माण सकिदासँम्म रु. ७ अर्व ३३ करोड खर्च हुने अनुमान गरिएको छ । यो विमानस्थलको कुल ४५ मिटर चौडाई र ३ हजार मिटर लामो धावनमार्ग हुने छ । विमानस्थलको धावनमार्ग, ट्याक्सी वे लगायत सिभिल निर्माणतर्फको काम सम्पन्न भई सकेको छ भने हाल विधुत जडानको काम भइरहेको छ अन्तराष्ट्रिय ट्रमिनल भवन, प्रशासनिक भवन, अग्नी निवारण भवन, जहाज पार्किङ क्षेत्र, पेरिमिटर सडक, फेन्सिङ निर्माण, रङरोगन तथा कन्ट्रोल टावरको काम सम्पन्न भई उपकरण जडानको काम तिव्र गतिमा भइरहेको छ ।

लकडाउनको अवधिमा पनि २९ जना चिनियाँसहित करिब २७५ जना नेपाली कामदारले दैनिक रुपमा काम गरेका थिए । हाल उपकरण जडानमा ३५ जना चिनियाँ दक्ष प्राविधिक–इन्जिनियरहरु नेपालमा झिकाउनको लागि आवश्यक कागजात तयार गरी सम्बन्धित निकायमा पत्रचार गरिएको छ । उक्त जडानको काम सम्पन्न भएपछि पूर्णरुपमा विमानस्थलको काम समापन हुने कुरा गौतमबुद्ध अन्तराष्ट्रिय विमानस्थल आयोजना प्रमुख प्रवेश अधिकारीले बताउनु भएको छ ।