अखबार नेपाल ट्रेन्डिङ

एजेन्सी: भारतको पटनाका अधिकांश आवासीय क्षेत्रहरू डुबानमा परेका छन् । ठूलो वर्षा भएपछि बाढीका कारण भारतका उत्तर प्रदेश र बिहार राज्यमा एक सय जनाभन्दा बढी मानिसको मृत्यु भएको छ । ती राज्यका सहरी क्षेत्रमा वर्षा र बाढीले जनजीवन नराम्ररी प्रभावित बनाइदिएका दृश्यहरू सार्वजनिक भएका छन् ।

बाढीका कारण रेल सेवा, अन्य यातायात, स्वास्थ्य सेवा, विद्यालय तथा विद्युत् आपूर्ति अस्तव्यस्त भएका छन् । बिहीबार यता उत्तर प्रदेशमा मात्रै ९३ जनाको मृत्यु भएको बताइएको छ । बिहारमा २९ जनाको मृत्यु भएको उक्त राज्यको विपद् व्यवस्थापन निकायले जनाएको छ । बाढीले बिहारको मुख्य सहर पटना पनि प्रभावित भएको छ । पटनामा मानिसहरू डुङ्गा चढ्न बाध्य भएका छन् ।

सडकमा पानीमा डुबेका सवारीसाधनहरूको दृश्य सामाजिक सञ्जालमा सार्वजानिक भएका छन् । पटना शुक्रवारदेखि जलमग्न भएको हो । त्यहाँ धेरै आवासीय क्षेत्र डुबानमा परेका छन् । बिहार सरकारले भारतीय वायुसेनालाई हेलिकप्टर तथा पानी फाल्ने उपकरण उपलब्ध गराउन अनुरोध गरेको छ ।