अखबार नेपाल ट्रेन्डिङ

एजेन्सी: दक्षिण भारतमा बाढीका कारण १ सय ४४ जनाको ज्यान गएको छ । भारतीय अधिकारीहरुले दक्षिण भारतमा बाढीका कारण ज्यान गुमाउनेको सङ्ख्या १ सय ४४ पुगेको जनाएका हुन् ।

भारतीय सञ्चारमाध्यमका अनुसार ज्यान गुमाउनेमध्ये ६७ जना दक्षिणी राज्य केरलाका मात्र छन् । त्यसबाहेक अरु दर्जनौं मानिसहरु हराइरहेको र २ लाखभन्दा बढीलाई सुरक्षित स्थानमा सारिएको जनाइएको छ । बाढीले सडक, बिजुली र सञ्चारका पूर्वाधारमा नराम्ररी क्षति पुगेको बताइएको छ ।

बाढीका कारण विद्यालय, बजार र कलकारखाना बन्द गरिएको अधिकारीहरुले जनाएका छन् । यस्तै दर्जनौं रेल सेवा र हवाई उडान रद्द गरिएको छ । भारी वर्षा जारी रहेको र भौतिक संरचनामा क्षति पुगेकाले उद्धार तथा खोजीकार्य समेत प्रभावित भएको छ ।