अखबार नेपाल ट्रेन्डिङ

झापा: अज्ञात समूहले झापा बिर्तामोड नगरपालिकाको गरामनीस्थित संयुक्त वडा कार्यालयमा बम विष्फोट गराएको छ । तीनवटा वडा कार्यालय सञ्चालनमा रहेको भवनमा आज विहान साढे ४ बजे बम विष्फोट भएको हो ।

बिर्तामोड-९ स्थित गरामनीमा ७, ८ र ९ नम्बर वडा कार्यालय सञ्चालनमा रहेको भवनमा शक्तिशाली वम विष्फोट भएको जिल्ला प्रहरी कार्यालय झापाले जनाएको छ । झापाका प्रहरी प्रवक्ता डीएसपी महेन्द्रकुमार श्रेष्ठका अनुसार विष्फोटबाट कार्यालय भवनको ६ वटा झ्याल, कोठाभित्र रहेका फर्निचरका सामान र कार्यालयको भित्तामा क्षति पुगेको छ ।

प्रहरीले त्यहाँ शक्तिशाली कुकर बम विष्फोट गराइएको प्रारम्भिक अनुमान गरेको छ । बम विष्फोट भएको वडा कार्यालयको भवन अस्थायी प्रहरी चौकी गरामनीबाट ५ सय मिटर उत्तरमा पर्छ । विष्फोटमा संलग्न समूहको पहिचान खुल्न नसकेको प्रहरीले जनाएको छ ।