अखबार नेपाल ट्रेन्डिङ

एजेन्सीः युक्रेनको सेनाका शीर्ष अधिकारीले रुसी सेनाको पाँच वटा लडाकू विमानसहित एक हेलिकोप्टर खसालेको दाबी गरेको छ ।

बिहीबार बिहानदेखि रुसले युक्रेनमा आक्रमण गर्न थालेको थियो । यसको प्रतिकारका क्रममा पूर्वी युक्रेनको लुहान्स्कमा पाँच रुसी लडाकू जहाज र एउटा हेलिकप्टर खसालिदिएको युक्रेनको सेनाले दावी गरेको हो ।

युक्रेनको बोर्डर गार्ड सर्भिसले बताए अनुसार युक्रेनका सेनामाथि रुसतर्फबाट मात्र नभए बेलारुसतर्फबाट पनि आक्रमण भएको छ ।

सर्भिसका अनुसार बिहीबार बिहान स्थानीय समयअनुसार ५ बजेतिर बेलारुसतर्फबाट पनि युक्रेनी सेनामाथि आक्रमण भएको छ ।

युक्रेनले बेलारुसले रुसलाई सहयोग गरिरहेको बताएको छ । एजेन्सीका अनुसार रुसले २०१४ मा कब्जा गरेर युक्रेनबाट खोसेको क्रिमिया क्षेत्रबाट पनि युक्रेनमाथि आक्रमण भइरहेको छ ।

रुसी सेनाले युक्रेनका सैन्य अड्डा र हवाइ अड्डाहरुलाई निशाना बनाएर ध्वस्त पारिदिएको बताएको छ । युक्रेनले पनि कडा प्रतिक्रिया दिँदै हार नमान्ने बताएको छ ।

युक्रेनी राष्ट्रपति भोलोदिमिर जेलेन्स्कीले देशवासीका नाममा सम्बोधन गर्दै नआत्तिन भनेका छन् । उनले देशवासीलाई सम्बोधन गर्दै भने ‘हामीले जित्नेछौं ।’

देशबासीलाई सम्बोधन गर्दै उनले आफूले एक मिनेट अगाडि मात्र अमेरिकी राष्ट्रपति जो बाइडेनसँग कुरा गरेको र बाइडेनले अन्तर्राष्ट्रिय समर्थन जुटाउन थालिसकेको बताए ।

युक्रेनमा सैन्य कारवाहीका बारेमा रुसी सेनाले पनि बयान जारी गरेको छ । बयानमा रुसी सेनाले युक्रेनको एयरबेस र सैन्य बेसलाई निशाना बनाएको बताएको छ ।

रुसी सेनाले बस्ती क्षेत्रलाई निशाना नबनाइएको बताएको छ । यसअघि युक्रेनमा कैयौं ठाउँहरुमा विष्फोट भएको खबर आएको थियो ।