अखबार नेपाल ट्रेन्डिङ

एजेन्सी: पाकिस्तानमा रहेर भारत प्रशासित क्षेत्र कश्मीरमा सक्रिय आतंकवादी संगठन जैश ए मोहम्मदका प्रमुख मौलाना मसुद अजहरलाई संयुक्त राष्ट्रसंघले आतंकवादी घोषणा गर्दै आतंककारीको सूचीमा राखेको छ ।

चीनले यसअघिको आफ्नो अडानलाई त्यागेर अजहरलाई अन्तर्राष्ट्रिय आतंककारीको सूचीमा राख्न आनाकानी गर्दै आएको थियो । तर अहिले चीन पनि उनलाई अन्तर्राष्ट्रिय आतंककारीको सूचीमा राख्न सहमत भएको अन्तर्राष्ट्रिय सञ्चारमाध्यमले जनाएका छन् । यसअघि गत फेब्रुअरी महिनामा फ्रान्स, बेलायत र अमेरिकाले संयुक्त राष्ट्रसंघ सुरक्षा परिषद् अन्तर्गतको अल कायदा तथा इस्लामिक स्टेट नाकाबन्दी समितिमा मसुद अजहरलाई आतंककारीको सूचीमा राख्न गरेको प्रस्तावलाई चीनले अस्वीकार गरेको थियो ।

अन्तर्राष्ट्रिय आतंककारीको सूचीमा परेपछि अब मसुद अजहरमाथि हतियार खरिदविक्री तथा यात्रामा प्रतिबन्ध लाग्नुका साथै उनको चलअचल सम्पत्ति पनि रोक्का हुनेछ । मसुद अजहरको आतंकवादी संगठन जैश–ए–मोहम्मदले गत फेब्रुअरी महिनामा ४० भन्दा धेरै भारतीय अर्धसैनिक मारिनेगरी भारतको प्रशासित कश्मीरको पुलावामामा आत्मघाती बम विष्फोट गराएको जिम्मा लिएको थियो । यो समूहको अन्तर्राष्ट्रिय आतंकवादी संगठन अल कायदासँग पनि साँठगाँठ रहेको बताइन्छ ।

सन् १९९९ मा काठमाडौंबाट उडेको इन्डियन एअरलाइन्सको विमान अपहरणकर्ताहरूको मागबमोजिम यात्रुहरूलाई सकुशल छाडिदिने शर्तमा भारतले रिहा गरेको मसूद अजहरले नै जैश ए मोहम्मद समूह गठन गरेका हुन् । त्यस्तै सन् २००१ को डिसेम्बरमा दिल्लीस्थित भारतको केन्द्रीय संसद्‌मा आक्रमण गरेको दोष समेत भारतले जैश-ए-मोहम्मदमाथि लगाउँदै आएको छ ।