अखबार नेपाल ट्रेन्डिङ

काठमाडौं: भारतीय समाचार च्यानलले नेपाल र प्रधानमन्त्री केपी शर्मा ओलीप्रति आपत्तिजनक समाचार प्रशारण गरेपछि नेपालका च्यानल सेवा प्रदायक संस्थाहरुले भारतीय च्यानल दुरदर्शन बाहेक सबै च्यानल बन्द गरेका छन् ।

बिहीबार रातीबाट लागु हुनेगरी च्यानलहरु बन्द गरिएको मेगा म्याक्स टिभीका उपाध्यक्ष धुव्र शर्माले जानकारी दिएका छन् । पछिल्ला दिनहरुमा भारतीय च्यानलले प्रशारण गरिरहेका सामाग्री नेपालको सम्प्रभुतामाथिकै आक्रमण गरेकाले भारतीय च्यानल बन्द गर्ने निर्णय गरेको शर्माले बताए ।

अहिले च्यानल बन्द गर्ने सेवा प्रदायकहरुको सेवा नेपालका करिब ४० लाख मानिसलाई कभर गर्छन् । लगभग सबै ठूला अपरेटरले च्यानल बन्द गरेका छन् । यदि कसैले गरेको छैन भने पनि शुक्रबारसम्म बन्द गरिने शर्माले जानकारी दिए ।

नेपालले नयाँ नक्सा जारी गरेपछि भारतीय सञ्चार माध्यमहरुले लगातार नेपालविरुद्ध सामाग्रीहरु प्रशारण गरिरहेका छन् । पछिल्लो पटक प्रधानमन्त्री ओली र चिनियाँ राजदूत होउ यान्छीलाई जोडेर आपत्तिजनक रिपोर्ट प्रशारण गरेका थिए ।