अखबार नेपाल ट्रेन्डिङ

एजेन्सीः विश्वभर कोरोना संक्रमितको संख्या १ करोड ५ लाख ८५ हजार १ सय ५२ पुगेको छ । तीमध्ये ५७ लाख ९५ हजार ९ जना उपचारपछि निको भएका छन् भने ५ लाख १३ हजार ९ सय १३ जनाको मृत्यु भएको छ ।

पछिल्लो २४ घण्टामा १ लाख १९ हजार ५० जना नयाँ संक्रमित थपिएका छन् । तीमध्ये सबैभन्दा धेरै अमेरिकामा २७ हजार चार, भारतमा १८ हजार २ सय ५६, ब्राजीलमा १३ हजार १ सय ९० र दक्षिण अफ्रिकामा ६ हजार ९ सय ४५ जना संक्रमित भएका छन् । ती मध्ये सबैभन्दा धेरैको मृत्यु ब्राजिलमा भएको छ । ब्राजिलमा एक दिनमा ५ सय ४२ जनाले ज्यान गुमाएका छन् । भारतमा ५ सय ६ जनाको मृत्यु भएको छ भने अमेरिकामा ५ सय ३ जनाले पछिल्लो २४ घण्टामा ज्यान गुमाएका छन् ।

यसैबीच कोरोना भाइरस संक्रमितको संख्या बढ्न थालेपछि अमेरिका, बेलायत र अस्ट्रेलियाका केही स्थानमा पुन लकडाउन गर्न थालिएको छ । अमेरिकाको एरिजोनामा सरकारले बार, जिमखाना, सिनेमा थिएटर र वाटर पार्कमा ३० दिनका लागि पुन लकडाउन घोषणा गरेका छ ।

एरिजोनामा अहिलेसम्म ७६ हजार ९ सय ८७ जना संक्रमित भेटिएका छन् । तीमध्ये १ हजार ५ सय ८८ जनाको मृत्यु भएको छ । फ्लोरिडाले पनि दक्षिणी समुद्र तटमा जान ४ जुलाई सम्म रोक लगाएको छ । टेनेसीमा २९ अगस्टसम्म संकटकाल बढाइएको छ ।

बेलायतको लिसेस्टर सहरमा फेरि लकडाउन घोषणा गरिएको छ । यहाँका अत्यावश्यक बाहेकका सबै सेवा र स्कुल बन्द गरिएको छ । लिसेस्टरमा एक हजार भन्दा बढीमा कोरोना संक्रमण पुष्टि भएको छ भने २ सय ७१ जनाको मृत्यु भएको छ ।

अस्ट्रेलियको मेलबर्न सहरमा ३२ उपनगरमा फेरि एक महिना लामो लकडाउन घोषणा गरिएको छ । अन्तर्राष्ट्रिय उडानलाई मेलबर्न आउनलाई रोकिएको छ ।