अखबार नेपाल ट्रेन्डिङ

काठमाडौं: गायिका आस्था राउत चार हजार धरौटीमा रिहा भएकी छन् । अनुसन्धानका लागि प्रहरी हिरासतमा रहेकी राउत मंगलबार रिहा भएकी हुन् । जिल्ला प्रशासन कार्यालयले राउतसँग अभद्र व्यवहार मुद्दामा चार हजार धरौटी माग गर्ने आदेश गरेको थियो ।

यसअघि सोमबार जिल्ला प्रशासन कार्यालय काठमाडौंले गायिका राउतलाई चार दिनसम्म हिरासतमा राखेर अनुसन्धान गर्न अनुमति दिएको थियो । काठमाडौं प्रहरी परिसर, टेकुले जिल्ला सरकारी वकिल कार्यालय, काठमाडौंमार्फत म्याद थपका लागि जिल्ला प्रशासनमा उपस्थित गराएपछि उनीमाथि अनुसन्धान गर्न चार दिनको समय दिइएको थियो ।

त्रिभुवन विमानस्थलमा महिला प्रहरीले आफूलाई दुर्व्यवहार गरेको भन्दै सामाजिक सञ्जाल मार्फत प्रहरीलाई गाली गरेपछि हिरासतमा पुगेकी गायिका आस्था राउतले रिहा हुने क्रममा प्रहरीको प्रशंसा गरेकी छन् । उनले प्रहरीले आफूलाई राम्रो व्यवहार गरेको, एकजनाको गल्तीले संगठनलाई गाली गर्न नहुने भन्दै प्रशंसा गरेकी थिइन् । “मेरो पनि केही गल्ती भयो,” आस्थाको भनाइ थियो, “एकजनाको गल्तीले गर्दा सबै प्रहरीलाई मुछ्न हुने थिएन । सबैले माया गरिदिनुभयो । मेरो कुरा सुनिदिनुभयो । प्रहरीको व्यवहार राम्रो पाएँ । म आफैं गएको हुँ ।”

उनले पत्रकारले पनि जे हो त्यही लेखिदिनुपर्ने भन्दै आक्रोश पोखेकी थिइन् । “मलाई सम्मानपूर्वक राख्नुभयो,” पत्रकारहरुसँग भनिन्, “मलाई कारागारभित्र राखेजस्तो नगरिदिनुस्, त्यसरी नलेखिदिनुस् । जे हो त्यही सत्य लेखिदिनुस् ।” उनले सानो विषयलाई ठूलो इस्यु बनाइएको बताएकी थिइन् ।