अखबार नेपाल ट्रेन्डिङ

काठमाडौं: नेपाल अन्तर्राष्ट्रिय नाट्य महोत्सवको अवसरमा थिएटर मल कीर्तिपुरमा नाटक ‘गैंडा टाइम्स’ मञ्चन भएको छ । नाटकमा बहिरा व्यक्तिहरूको सहजताका लागि सांकेतिक भाषाको प्रयोग भयो । नाटक भइरहँदा अगाडी बसेका दोभाषेले बहिराहरुलाई कथा बुझाए ।

इमान वा ताजको रुपमा रहेको आफ्नो बाबुको खाग चोरिएपछि सामाजिक मर्यादामा आँच आउँछ । उ मुखिया बन्न योग्य रहँदैन । त्यसैले खाग फिर्ता ल्याउन गैंडा केटो काठमाडौं हिड्छ । काठमाडौंमा उसले भोग्न पर्ने परिस्थिति, उताव चढावहरुको सेरोफेरोमा नाटक घुम्छ ।

‘गैंडा टाइम्स’ लेखक बुद्धिसागर लिखित कथामा आधारित छ । कथाको नाट्य रुपान्तरण प्रविण खतिवडाले गरेका हुन् । नाटकमा सागर खाती, सुमित्रा पेहिम, आस्था निरौला, मौषम राना, पासाङ चोमु शेर्पा “खुशी”, विकास राना, किरण भेटवाल, दिवेश लामिछाने, दिपक खरेल, सुवास खरेल, प्रवीण मगर, याङसाङ मुकारुङको अभिनय रहेको छ ।

नाटक नेपाल अन्तर्राष्ट्रिय नाट्य महोत्सव अन्तर्गत पोखरामा र बिराटनगरका नाटकघरहरुमा पनि मञ्चन हुनेछ । पोखरास्थित गन्दर्व थिएटरमा ३ मार्च आइतबार नाटक मञ्चन हुनेछ । त्यस्तै बिराटनगरस्थित आरोहण गुरुकुलमा नाटक मार्च सातमा देखाइनेछ ।