अखबार नेपाल ट्रेन्डिङ

कलाकारिता त्यस्तो पेसा हो, जसले समाजको यथार्थचित्र प्रस्तुत गर्दछ । र, समाजलाई सत्मार्गमा अघि बढाउन अभिप्रेरित गर्छ । आमनागरिकमा चेतनाको बहाव ल्याउन कलाकारिताको भूमिका प्रधान हुन्छ । कला र कलाकारको सम्मानको कुरा बेलामौकामा उठिरहन्छ । के बृद्ध के आधावैशे  के बालक सबैको हरपल सुख दुःखको सारथीमा मलमपट्टि सहित औषधिको रुपमा साहित्य, कला, गीतसंगीतलाई लिने गरिन्छ ।

चाहे चर्चित होस या गुमनाम नै किन नहोस् अहिले नेपाली गीतसंगीत तीन भागमा बाँडिएको महशुस गर्न सकिन्छ । एक खालको गीतसंगीत चर्चाको लागि आफ्नो सिर्जनालाई उदाङ्गो बनाई भाईरलको पछि लागेर चर्चा कमाइरहेको पाईन्छ । अर्का थरिका गीतसंगीत सबै पक्षलाई समेटेर गुणस्तरीय भएर पनि सफल मानिएका सिर्जना केहि समयसम्म लोकप्रिय भएर केहि समयपछि गुमनाम भएर जाने पनि पाईन्छ । अर्का खालका गीत संगीत भने गुमनाम तर गुणस्तरीय भएतापनि आफ्ना शुभचिन्तकले खोजी गरेर सुनिने÷हेरिने प्रचलन रहेको छ । यस्ता प्रकारका गीतसंगीतलाई स्तरीय र बौद्धिक प्रेरणादायिक सिर्जनाको रुपमा लिईन्छ ।

त्यस्तै यहि साहित्य, कला, गीतसंगीतको भिडमा एक दशकदेखि संघर्षरत एक युवा प्रतिभा गायक तथा संगीतकार हुन विजय थापा । उनी नेपालकै राजधानी काठमाडौं नजिक रहेको गल्छी गाउँपालिका–८ धादिङ जिल्लाको गोगनपानीबाट उदाएका प्रतिभावान संगीतकार तथा गायक हुन । बुबा अर्जुन थापा र आमा सरस्वती थापाकी कोखबाट जन्मिएका ४ परिवार मध्ये उनी कान्छा छोरा हुन । सानैदेखि बेग्लै स्वभाव रहेको र गायनमा धेरै रुची भएका कारण साथीभाईबीच उनले गीत गाउँदै सुनाउने गर्दथे । गीत गायनकै कारण उनले अध्ययन गर्ने स्कुलमा शिक्षक शिक्षिकाहरुबाट सबैको माया पाएकाले कलकार बन्ने सपना बोकेर काठमाडौ आएको उनी बताउँछन् ।

पुराना तथा नयाँ अग्रज गायक झलकमान गन्धर्व, राम थापा, रामकृष्ण ढकाल र शिव परियारका गीत धेरै मन पराउने र उहाँहरुबाट गीत गाउन आफु प्रेरित भएको उनी बताउँछन् । गायक बन्ने सपना बोकेको समयमा गायकको परिचय बनाउन उनले एल्बम पनि निकाले । २०७० सालमा “माई ड्रीम” नामक पहिलो एल्बम बजारमा लिएर उनी नेपाली सांगीतिक क्षेत्रमा औपचारिक रुपमा उदाए । जुन एल्बममा उनले ४ वटा गीत समेटेका थिए । जसमा “देखे तिमीलाई सपनीमा…”  “यो मायाले…” “आई लव यू…” “सुर्तीमा मोहनी…” रहेको छ । एल्बम बजारमा आएपछि उनमा एक खालको आत्मा सन्तुष्टि त मिल्यो नै उनले फेरि २०७३ सालमा दोस्रो एल्बम “माई ड्रीम २” बजारमा ल्याए । जसमा उनले “ओ नारन दाँते है ओखर…” “देखे तिमीलाई सपनीमा २…” “पूर्वै शहर…” “आमा…” बोलको ४ वटा गीत आम दर्शक स्रोतामाझ ल्याए । उनका पहिलो एल्बमबाट “देखें तिमीलाई सपनीमा…” र दोस्रो एल्बमबाट “ओ नारन दाँते है ओखर…” स्रोता दर्शकले धेरै रुचाएका गीत हुन । हालसम्म उनले दुई दर्जन भन्दा बढी गीत गाईसकेका छन भने धेरै सहकार्यको रुपमा लोकप्रिय चर्चित संगीतकार कल्याणसिंहसँग काम गरेको उनी बताउँछन् । हालै उनले शंकर भुजेलको शब्द रहेको “आँशु बिक्ने सहर भए खुशी किन्थे होला…” बोलको गीत लिएर आम दर्शक/स्रोता माझ आउने तयारीमा जुटेको बताए ।

गायक विजय थापा विभिन्न संघ संस्थाबाट सम्मानित पनि भएका छन । उनले “जिनियस म्यूजिक अवार्ड” बाट र “बक्स अफिस म्यूजिक अवार्ड” द्वारा पब्लिक च्वाईस अवार्डबाट समेत सम्मानित भएका छन् । हाल उनको माग र क्रेज विभिन्न मेला महोत्सवको स्टेजमा रहेको छ । हाल उनी मेला महोत्सवको स्टेज कार्यक्रममा व्यस्त छन् ।