अखबार नेपाल ट्रेन्डिङ

काठमाडौं: रियालिटी शो ‘कमेडी च्याम्पियन’को दोस्रो संस्करणको फाइनलमा भरतमणि पौडेल प्रवेश गरेका छन् ।

शनिबार प्रसारण भएको कार्यक्रममा भरतमणिले पूर्व युवराज पारस शाहको अवतारमा आफूलाई प्रस्तुत गरेका थिए । सो अवतारको अहिले सामाजिक सञ्जालमा निकै चर्चा पाएको छ ।

हाल युट्युबको ट्रेन्डिङ नम्बर दुईमा रहेको कार्यक्रममा भरतमणिले पूर्व युवराज पारसको बोलीको नक्कल गर्दै निर्णायकहरुमाथि कटाक्ष गरेका थिए ।

पछिल्लो पटक हेलमेट विवादमा आएका पूर्व युवराजको विषयवस्तुलाई पनि उनले समेटे । उनको यो प्रस्तुतिलाई दर्शकले जस्तै निर्णायकले पनि उत्तिकै मन पराएका थिए ।

यो प्रस्तुतिसँगै उनी कमेडी च्याम्पियनको दोस्रो संस्करणको फाइनलमा प्रवेश गरेका हुन् ।

विक्की अग्रवालले रुँदै स्टेज छोडेपछि…

यसैबीच भारतको सिक्किमदेखि आएर प्रतिस्पर्धा गरिरहेका विक्की अग्रवालले कमेडी च्याम्पियनको स्टेजमा पहिलोपटक ‘माइम एक्ट’ ट्राइ गरेका थिए ।

मानिस निदाएको बेला मन कसरी सक्रिय हुन्छ ? भन्ने थिममा उनले संवादहीन अभिनय पस्किएका थिए ।

तर, आवश्यकताभन्दा बढी प्रयोग गर्न खोज्दा यो प्रस्तुति उनका लागि कतै ‘आत्मघाती’ बन्ने त होइन भन्ने चिन्ता आम दर्शकको मनमा उब्जेको छ ।

मोनोलगको सहारामा विक्कीले दिएको प्रस्तुति कलात्मक थियो र उनी फरक टेस्ट दिन सफल भए । तर उनको प्रस्तुति भने ‘कमेडी’ थिएन ।

कमेडी च्याम्पिनयमा दर्शक हँसाउने प्रतिस्पर्धाको निर्णायक मोडमा विक्कीले थियटरमा देखाउनेजस्तो गम्भीर र अमूर्त खालको प्रहसन गरेर कठोर निर्णय गरेका छन् ।

विक्की स्वयंले आफू फाइनलका लागि छनोट हुन नसक्ने खतरा बुझेर पनि यो विधा छनोट गरेको उनले बताए ।

‘मलाई थाहा छ, मलाई यसले फाइनलमा नपुर्‍याउन सक्छ,’ प्रस्तुतिपछि भावुक देखिएका उनले भने ।

विक्कीको प्रस्तुतिमा सन्तोष पन्तबाहेकका तीन जना निर्णायकले ‘स्टान्डिङ अभेसन’ दिएर तारिफ गरेका थिए ।

निर्णायकमण्डलका प्रदिप भट्टराई, ऋचा शर्मा र मनोज गजुरेलले एक स्वरले विक्कीको प्रशंसा गरिरहँदा सन्तोष पन्तले भने अलि क्रिटिकल कमेन्ट गरे ।

‘नेपाली समाजले र दर्शकले तिम्रो प्रस्तुति बुझ्दैन । मैले त बुझिनँ । यो हँसाउने शो हो, तर तिम्रो प्रस्तुतिमा कोही हाँस्यो त ? तिम्रो आफ्नै टेस्ट छ, त्यसलाई नै निरन्तरता देउ ।’

पन्तको जवाफमा विक्कीले भने, ‘यदि म आउट भएँ भने पनि मलाई जिरो पर्सेन्ट पनि पश्चाताप हुने छैन पेन्टोमाइम एक्ट गरेकोमा ।’

प्रदिप भट्टराईले थप बोल्दै गर्दा विक्की अचानक स्टेजबाट बाहिरिए । उनी ब्याकस्टेजमा गएर रुन थालेपछि प्रोग्राम होस्ट र जजहरु गएर सम्हालेका थिए ।