अखबार नेपाल ट्रेन्डिङ

बजारमा अहिले विभिन्न ब्यक्तिहरुका आफ्ना अनुभव र भोगाई समेटेर लेखिएका धेरै पुस्तकहरु प्रकाशित भएका छन् । तिनै पुस्तकहरुमध्य पढ्दा अलिक फरक अनुभुति हुने र सरल भाषामा उपलब्ध पुस्तक हो ‘संघर्ष’ ।

ईन्जिनियर गणेशराज वस्तीको दोस्रो संस्मरण कृति हो यो । भौतिक निर्माणका मात्र नभई शब्द चयन र संयोजन गर्ने कुशल क्षमता समेत भएका ईन्जिनियर वस्तीको यस्तो पुस्तक लेखन कार्यले नेपाली रचना र साहित्य क्षेत्रको श्रीबृद्धिमा एउटा र्इँटा थप्ने काम गरेको छ ।

नौ वटा संस्मरणखण्ड रहेको यस पुस्तकमा मध्यम वर्गीय परिवारले भोग्नु परेको घटनाको वास्तविक चित्रण गरिएको छ । सरल भाषाशैलीमा लेखिएको यस पुस्तकमा लेखक आफैले भोगेका घटनामा आधारित छ । लेखकले यस पुस्तकमा बिबिधताले भरिपूर्ण नेपालको प्रकृतिक सौन्दर्यताको साथै विभिन्न समयमा जीवनमा आएका समस्या, भोगाई तथा प्राप्त गरेका सफलता असफलताको मार्मिक रुपमा वर्णन गरेका छन् ।

निम्न तथा मध्यम वर्गीय परिवारले भोग्नु परेको पिडा प्रतिनिधि पात्र भएर प्रकाश पारेका छन । यस पुस्तकमा लेखकका जीवनका दुःखसुख अनुभव भोगाईलाई उतारेका छन । उनले पढाई र त्यसका क्रममा भोगेका वातावरण, परीक्षाका अनुभव तथा हाँसिल गरेका नतिजाले पारेका प्रभावलाई शब्दका माध्यमबाट उतारेर यसले जीवनमा पारेका तत्कालीन र दिर्घकालीन प्रभावलाई समेत प्रस्तुत गरेका छन ।

शब्द चयनमा निपुण वस्तीका रचना सजिलै बुझ्न सकिने हुन्छ । २०२४ सालमा गोरखाको सिरान्चोकमा जन्मिएका ईञ्जिनियर वस्तीका प्रविधिक सेवा प्रश्नोत्तर संग्रह २०६६, ईन्जिनियर सेवा प्रतियोगितात्मक परिक्षा दिग्दर्शन २०७१, भवन आवास तथासहरी विकास (नेपाल सन्दर्भ) २०७३, मनको आँधी कविता संग्रह २०७४ र नियात्रा २०७५ जस्ता कृतिहरु यस अघि नै प्रकाशित भईसकेका छन ।