अखबार नेपाल ट्रेन्डिङ

काठमाडौं:  इन्फिनिटी लघुवित्त वित्तीय संस्थाले चालू आर्थिक वर्षको पहिलो त्रैमासमा रू. २ करोड १८ लाख ३ हजार खुद नाफा कमाएको हो । कम्पनीले कात्तिक २४ गते सार्वजनिक गरेको पहिलो त्रैमासको वित्तीय विवरण अनुसार गत वर्षभन्दा यस वर्ष ३५ प्रतिशत बढी नाफा गरेको हो । गत वर्ष कम्पनीले रू. १ करोड ६१ लाख ५ हजार खुद नाफा गरेको थियो ।

यो वर्ष कम्पनीको खराब कर्जा संकलन बढेसँगै नाफा बढेको हो । चालू आवको पहिलो त्रैमासमा कम्पनीले रू. १ करोड ४२ लाख खराब कर्जा संकलन गरेको छ । खराब कर्जा संकलन गरेपनि कम्पनीको निष्क्रिय कर्जा गत वर्षभन्दा यो वर्ष बढेको छ । गत वर्ष १ दशमलव १३ प्रतिशत रहेको निष्क्रिय कर्जा यस वर्ष १ दशमलव ३७ प्रतिशत पुगेको हो ।

हाल कम्पनीको चुक्तापूँजी रू. २२ करोड ८१ लाख ४० हजार रहेको छ । कम्पनीको जगेडा कोषमा रू. १२ करोड २४ लाख ६६ हजार छ । चालू आवको पहिलो त्रैमाससम्ममा कम्पनीले रू. २ अर्ब १६ करोड ६ लाख २ हजार कर्जा सापटि लिएको छ । पहिलो त्रैमासमा रू. ७२ करोड ४५ लाख २१ हजार निक्षेप संकलन गरेको कम्पनीले रू. २ अर्ब ७२ करोड ४३ लाख कर्जा प्रवाह गरेको छ ।

गत वर्ष रू. ३ करोड ९२ लाख ३९ हजार खुद ब्याज आम्दानी गरेको कम्पनीले यस वर्ष रू. ३ करोड ३० लाख ४४ हजार यो आम्दानी गरेको छ । चालू आवको पहिलो त्रैमाससम्म कम्पनीको प्रतिशेयर आम्दानी वार्षिक रू. ३८ दशमलव २३ रहेको छ भने प्रतिशेयर नेटवर्थ रू. १५३ दशमलव ६८ रहेको छ ।