अखबार नेपाल ट्रेन्डिङ

ललितपुर: “नेपाली उत्पादनको प्रवर्द्धन हाम्रो अभियान” भन्ने मुख्य नारा सहित यहि असोज १० देखि कार्तिक ३ गते सम्म जाउलाखेल खेल मैदानमा बडादशैं जुत्ता चप्पल व्यापार मेला २०८० आयोजना हुने भएको छ ।

नेपालमा जुत्ता चप्पल उत्पादन गर्ने उद्योगी व्यावसायीहरुको समुह स्वदेशमा उत्पादित जुत्ता चप्पलहरु र स्वदेशी व्राण्डहरुलाई आम उपभोक्ताहरुबीच परिचित गराउने र आम उपभोक्ताहरुलाई स्वदेशी वस्तु नै प्रयोग गर्ने भावनाको विकास गराई स्वदेशी उत्पादन प्रयोगका निमित्त उपभोक्ताहरुको रुची जगाउने उद्देश्यका साथ यो मेला गर्न लागिएको आयोजकले पत्रकार सम्मेलन मार्फत जानकारी दिएको छ ।

नेपालको आर्थिक अवस्था मन्दी र बैंकहरुमा देखिएको आर्थिक तरलताका कारण देशका हरेक क्षेत्रहरु प्रभावित भएको र कृषि, पर्यटन लगायत उत्पादन मुलक औद्योगिक क्षेत्रहरु चरम आर्थिक संकट व्यहोर्न बाध्य भएकाले यस्तो विषम परिस्थितिमा उद्योगी व्यावसायीहरुको मस्तिष्कलाई सकारात्मक बनाउदै  देशको अर्थतन्त्रलाई गतिशिल र चलायमान बनाउनका निमित्त केही न केही गतिविधिहरु निरन्तर गरि रहन आवश्यक भएकाले यो अभियानमा लागेको आयोजकले जानकारी गराएको छ ।

मेलामा नेपालमा स्थापित चर्चित जुत्ता चप्पल उत्पादक कम्पनी र व्राण्डहरु  रोयल शु इण्डष्ट्रिजको उत्पादन रोयल शुज, वेश फुटवेयरको उत्पादन  वि.एफ डियर हिल र वि.एफ स्पोर्ट, लालीगुरास फुटवेयरको क्रस रोड शुज, शुभकामना फुटवेयरको फस्टवाक शुज, नमस्ते फुटवेयरको सिल, आर.डि.कलेक्सनको हाई लाईफ, केटिएम शुजको केटिएम, डि.जे. शुज कम्पनीको डि.जे. शुज, फुड फेशनको वेली शुज, सर अनिल ट्रेड लिंक्सको उत्सव र कोसेली छाला जुत्ता उद्योगको कोसेली सुज गरि ११ वटा कम्पनी र व्राण्डहरुको सहभागिता रहनेछ ।

वडादशैं पर्व लक्षित मेलामा नयाँ-नयाँ डिजाईनका जुत्ता चप्पल आकर्षक मुल्यमा उपलव्ध हुनेछन् । सो अवसरमा नयाँ उत्पादनहरु  मेलामा लञ्च गरिने छ भने मेला अवधिभर विशेष छुटको व्यवस्था पनि रहेको जनाईएको छ । मेलामा न्युनतम २० प्रतिशतदेखि कतिपय उत्पादनहरुमा ५० प्रतिशतसम्मको छुटको व्यवस्था मिलाईएको छ ।

मेला अवधिभर ३ लाख अवलोकनकर्तालाई अवलोकन गराउने आयोजकले लक्ष्य राखेको छ भने प्रवेशमा निःशुल्क गराईने आयोजकको भनाई छ । मेला बिहान ९ बजे देखि बेलुकी ७ बजे सम्म खुल्ला रहनेछ ।