अखबार नेपाल ट्रेन्डिङ

काठमाडौं: सम्पत्ती बीमा वापतको बीमा शुल्क २१ दशमलव ८० प्रतिशतले बढेको छ । पछिल्लो समय बीमा प्राधिकरणको तथ्यांकले सम्पत्ति बीमा गर्नेहरुको संख्या बढेसँगै बीमा शुल्क संकलन पनि बढेको देखिएको हो ।

गत असोज महिनाको तुलनामा कात्तिक महिनामा सम्पत्ति बीमा शुल्क रकम ५१ करोड ४० लाख रुपैयाँले बढेको प्राधिकरणले जनाएको छ । प्राधिकरणका अनुसार यस अवधिमा सम्पत्ती बीमा वापत दुई अर्ब ८७ करोड १२ लाख रुपैयाँ बीमा शुल्क संकलन भएको छ ।

विभिन्न कम्पनीहरुले एक लाख ३० हजार २३८ बीमालेख बिक्री गरी सो बराबरको बीमा शुल्क संकलन गरेका हुन् । गत असोज महिनामा निर्जीवन बीमा कम्पनीहरुले एक लाख ३० हजार २३८ बीमालेख बिक्री गरी दुई अर्ब ३५ करोड ७२ लाख रुपैयाँ बीमा शुल्क संकलन गरेका थिए ।

प्राधिकरणका अनुसार चालु आवको कात्तिक महिनामा निर्जीवन बीमा कम्पनीहरुले सम्पत्ति वापत गरिने बीमाबाट प्रदेश नम्बर १ मा ४१ करोड ३९ लाख रुपैयाँ बीमा शुल्क आर्जन गरेका छन् । कम्पनीहरुले २५ हजार १३० बीमालेख बिक्री गरी सो बराबरको बीमा शुल्क संकलन गरेका हुन ।

त्यस्तै, मधेश प्रदेशमा बीमा कम्पनीहरुले सम्पत्ति वापत गरिने बीमाबाट २७ करोड ६६ लाख रुपैयाँ बीमा शुल्क आर्जन गरेका छन् । यस अवधिमा कम्पनीहरुले उक्त प्रदेशमा १५ हजार ५०२ बीमालेख बिक्री गरेका छन् ।

त्यसैगरी, निर्जीवन बीमा कम्पनीहरुले बागमती प्रदेशमा सम्पत्ति बीमाबाट सबैभन्दा बढि बीमाशुल्क संकलन गरेका छन् । कम्पनीहरुले सो प्रदेशबाट ६१ हजार ४२८ बीमालेख बिक्री गरी एक अर्ब ५८ करोड ८७ लाख रुपैयाँ बीमाशुल्क आर्जन गरेका हुन् ।

प्राधिकरणका अनुसार गण्डकी प्रदेशबाट निर्जीवन बीमा कम्पनीहरुले सम्पत्ति बीमाबाट १५ करोड २१ लाख रुपैयाँ बीमा शुल्क आर्जन गरेको देखिन्छ । यस अवधिमा कम्पनीहरुले १८ हजार ५२९ बीमालेख बिक्री गरेका छन् ।

त्यस्तै, लुम्बिनी प्रदेशमा बीमा कम्पनीहरुले २७ हजार ५६३ बीमालेख बिक्री गरी ३२ करोड ७३ लाख रुपैयाँ बीमाशुल्क आर्जन गरेका छन् । उक्त बीमा शुल्क अघिल्लो महिनाको तुलनामा ६ करोड ३५ लाख रुपैयाँले बढि हो ।

त्यसैगरी, कर्णाली प्रदेशमा कम्पनीहरुले सम्पत्ति बीमाबाट सबैभन्दा कम दुई करोड ९१ लाख रुपैयाँ बीमाशुल्क आर्जन गरेका छन् । यस अवधिमा कम्पनीहरुले ४ हजार ५९९ बीमालेख बिक्री गरी सो बराबरको बीमा शुल्क संकलन गरेका हुन् ।

प्राधिकरणका अनुसार सुदुरपश्चिम प्रदेशबाट निर्जीवन बीमा कम्पनीहरुले सम्पत्ति बीमाबाट ८ करोड ३२ लाख रुपैयाँ बीमा शुल्क आर्जन गरेका छन् । यस अवधिमा उक्त देशबाट १० हजार ५०५ बीमालेख बिक्री भएको छ ।