अखबार नेपाल ट्रेन्डिङ

काठमाडौं: हिमालयन बैंक र बैंक अफ काठमाण्डूको डेड अर्ब रुपैयाँ उठ्ने भएको छ । १० वर्षपहिला  मेलम्ची खानेपानी आयोजनाको काउन्टर ग्यारेन्टीका लागि राखेको रकम उठ्ने भएको हो ।

दुई बैंकले चाइनाको सर्वोच्च अदालतमा मुद्दा जितेसँगै डेढ अर्बभन्दा बढी रकम फिर्ता आउने भएको छ ।

शुक्रबार १० वर्ष पहिलाको मुद्दामा नेपाली बैंकको पक्षमा फैला भएपछि अब चाइना कन्स्ट्रक्सन बैंकले दुवै बैंकको पैसा फिर्ता गर्नुपर्ने भएको बैंक अफ काठमाण्डूका अध्यक्ष प्रकाश श्रेष्ठले जानकारी दिए ।

बैंक अफ काठमाण्डूले जमानतका लागि करिब १ अर्ब रुपैयाँ  र हिमालयन बैंकले करिब ७० करोड रुपैयाँ फिर्ता पाउने भएको छ ।

मेलम्ची खानेपानी आयोजनाको ठेक्का पाएको चाइना रेलवेकाका तर्फबाट चीनको बैंक चाइना कन्स्ट्रक्सन बैंकले हिमालयन बैंक र बैंक अफ काठमाण्डूलाई काउन्टर ग्यारेन्टी दिएको थियो ।

दुई वर्षअघि पनि दुवै बैंकले मुद्दा जितेका थिए । तर त्यसबेला मुद्दा हारेको पक्षलाई चीनकै माथिल्लो अदालतमा जाने बाटो बाँकी थियो। अब भने माथि जाने बाटो छैन ।

त्यसो हुँदा चाइना कन्स्ट्रक्सन बैंकले दुवै बैंकको पैसा फिर्ता गर्नुपर्ने अध्यक्ष श्रेष्ठले बताए । दुबै बैंकले आफ्नो पैसा फिर्ता गर्नका लागि दाबी सहितको पत्र पठाउने अध्यक्ष श्रेष्ठले बताए ।