अखबार नेपाल ट्रेन्डिङ

काठमाडौं: वाणिज्य बैंकहरुको निक्षेप संकलनमा सुधार देखिएको छ । एक महिनाको अवधिमा वाणिज्य बैंकहरुको निक्षेप १४ अर्बले बढेको हो ।

नेपाल बैंकर्स संघको तथ्यांक अनुसार फागुन ६ गते वाणिज्य बैंकहरुमा ४३ खर्ब १२ अर्ब रुपैयाँ निक्षेप रहेको थियो ।

उक्त निक्षेप फागुन अन्तिमसम्म आइपुग्दा १४ अर्ब रुपैयाँ बराबरले वृद्धि भएको हो ।

फागुन १३ गते शुक्रबारसम्म वाणिज्य बैंकहरुमा ४३ खर्ब १३ अर्ब रुपैयाँ निक्षेप थियो । उक्त निक्षेप संकलन बढेर फागुन २० गतेसम्म आइपुग्दा वाणिज्य बैंकहरुमा ४३ खर्ब २४ अर्ब रुपैयाँ पुग्यो ।

त्यस्तै, फागुन २७ गते शुक्रबारसम्म बैंकहरुमा ४३ खर्ब २६ अर्ब रुपैयाँ निक्षेप संकलन भएको छ ।

यस अवधिमा कर्जा प्रवाह पनि बढेको देखिन्छ । फागुन महिनामा वाणिज्य बैंकहरुले १० अर्ब कर्जा प्रवाह गरेको हुन् ।

संघको तथ्यांक अनुसार फागुन ६ गतेसम्म वाणिज्य बैंकहरुले ४१ खर्ब ५९ अर्ब कर्जा प्रवाह गरेका थिए । त्यस्तै, उक्त कर्जा प्रवाह फागुन १३ गतेसम्म आइपुग्दा वाणिज्य बैंकहरुले ४१ खर्ब ६५ अर्ब रुपैयाँ कर्जा प्रवाह गरेका थिए ।

त्यस्तै,  फागुन २० गतेसम्म वाणिज्य बैंकहरुले ४१ खर्ब ७० अर्ब रुपैयाँ कर्जा प्रवाह गरेका थिए । यस हप्ता भने कर्जा प्रवाह घटेको देखिन्छ ।

फागुन २० गतेदेखि २७ गतेसम्मको अवधिमा वाणिज्य बैंकहरुको कर्जा प्रवाह एक अर्बले घटेको संघको तथ्यांकमा उल्लेख छ ।