अखबार नेपाल ट्रेन्डिङ

काठमाडौं: सरकारले सहुलियतपूर्ण कर्जाका लागि व्याज अनुदान दिन थालेपछि सो कर्जा अन्तर्गत ऋण लिनेको सङ्ख्या एक लाख २९ हजार ६ सय ८० पुगेको छ ।

नेपाल राष्ट्र बैंकका अनुसार हालसम्म एक करोड भन्दा माथि त्यस्तो कर्जा उपयोग गर्ने ऋणीको सङ्ख्या नै एक हजार ८ सय ९० जना पुगेको छ ।

चालू आर्थिक वर्षको असोज मसान्तसम्ममा विभिन्न बैंक तथा वित्तीय संस्थाहरूबाट सहुलियतपूर्ण कर्जा उपयोग गर्ने कूल ऋणीको सङ्ख्या भने एक लाख २९ हजार ६ सय ८० रहेको छ ।

यस अन्तर्गत हालसम्म बैंक तथा वित्तीय संस्थाहरूले जम्मा एक खर्ब ९८ अर्ब ९२ करोड ३९ लाख ७७ हजार २ सय ९७ रुपैयाँ बराबरीको कर्जा प्रवाह गरेका छन् ।

यसरी कर्जा प्रवाह गर्नेमा सबैभन्दा अगाडी कृषि विकास बैंक देखिएको छ । जसले १३ हजार ५२ वटा कर्जा मार्फत २१ अर्ब ९५ करोड ७१ लाख ४० हजार ४ सय ५१ रुपैयाँ कर्जा प्रवाह गरेको हो । त्यस्तै, राष्ट्रिय वाणिज्य बैंकले १० हजार ५ सय ५० कर्जा मार्फत १० अर्ब ७२ करोड ६८ लाख ७७ हजार ५ सय ८ रुपैयाँ सहुलियतपूर्ण कर्जा प्रवाह गरेको छ ।

यस्तो ऋणी ठूलो सङ्ख्यामा प्रवाह अर्को सरकारी बैंकमा नेपाल बैंक रहेको छ । यस बैंकले ६ हजार ८४ ऋणीलाई ७ अर्ब ६२ करोड १८ लाख ५२ हजार एक सय ९३ रुपैयाँ सहुलियतपूर्ण कर्जा प्रवाह गरेको देखिन्छ ।

त्यसैगरि, नेपाल राष्ट्र बैंकको तथ्याङ्क अनुसार क वर्गका वाणिज्य बैंकहरुले एक लाख ९ हजार ६ सय १३ जनालाई सहुलियतपूर्ण कर्जा प्रवाह गरेका छन् भने विकास बैंकहरुले १८ हजार ४ सय ३४ ऋण प्रवाह गरेका हुन् । यता ग वर्गका वित्तीय संस्थाहरूले १५ सय २२ जनालाई सहुलियतपूर्ण कर्जा प्रवाह गर्दा घ वर्गका वित्तीय संस्थाहरूले भने एक सय ११ जनालाई मात्रै यस्तो ऋण दिएको देखिन्छ ।

हालसम्म यस्तो कर्जा प्रवाहका लागि ९ अर्ब १५ करोड २१ लाख ५८ हजार रुपैयाँ सहुलियतपूर्ण कर्जाका लागि कूल ब्याज अनुदान वितरण भइसकेको छ ।

युवा वर्ग स्वरोजगार कर्जाका रूपमा सहुलियतपूर्ण कर्जा लिने १७ जना मात्र रहेकोमा व्यावसायिक तथा तालिम परिसरबाट मान्यताप्राप्त संस्थाबाट लिइने तालिम शीर्षकमा दुई वटा कर्जा मात्रै प्रवाह भएको छ ।