रूरू जलविद्युतको सेयर बाँडफाँड, ३७ हजार ९ सय १६ जनाले पाए कम्पनीको साधारण सेयर
वि.सं.२०७८ वैशाख ३ शुक्रवार १४:१०
काठमाडौं: रूरू जलविद्युत परियोजना कम्पनीको साधारण सेयर बाँडफाँड भएको छ ।
कम्पनीले गुल्मीमा सञ्चालित ५ मेगावाटको माथिल्लो हुग्दी जलविद्युत आयोजनाको सर्वसाधारणका लागि निष्कासन भएको सेयर आज बाँडफाँड गरेको हो ।
आवेदकमध्ये ३७ हजार ९ सय ९ जनाले गोला प्रथावाट १० कित्ता सेयर पाएको बिक्री प्रबन्धक एनएमबी क्यापिटलले जनाएको छ ।
क्यापिटलका अनुसार थप ७ जना भाग्यमानीले ११ कित्ता सेयर पाएका छन् । मागभन्दा ६२ गुणा बढी आवेदन परेकाले २ प्रतिशतले मात्र सेयर पाएका छन् ।
कम्पनीको सेयर किन्न १६ लाख ६९ हजार ५ सय ६६ जनाले २ करोड ३३ लाख ७७ हजार २ सय २० कित्ताका लागि आवेदन दिएका थिए ।
कम्पनीले चैत २० गतेदेखि प्रतिकित्ता १ सय रुपैयाँमा २० रुपैयाँ प्रिमियम थप गरेर १ सय २० रुपैयाँ मूल्यमा सेयर निष्कासन गरेको थियो ।
४ करोड ८९ लाख २४ हजार ७ सय २० रुपैयाँ बराबरको ४ लाख ७ हजार ७ सय ६ कित्ता सेयर बिक्री खुल्ला गरेको थियो ।
निष्कासन भएको सेयरमध्ये ८ हजार १ सय ५४ कित्ता अर्थात २ प्रतिशत सेयर कर्मचारीका लागि, २० हजार ३ सय ८५ कित्ता अर्थात ५ प्रतिशत सामूहिक लगानी कोषका लागि सुरक्षित गरिएको थियो ।
बाँकी ३ लाख ७८ हजार १ सय ६७ कित्ता सेयरका लागि सर्वसाधारणका लागि छुट्टाइएको थियो ।
कम्पनीले यसअघि स्थानीयका लागि छुट्याएको ४ करोड ७ लाख ७० हजार ५ सय रुपैयाँ बराबरको ४ लाख ७ हजार ७ सय ५ कित्ता सेयर निष्कासन गरी बाँडफाँड गरिसकेको छ ।
स्थानीयका लागि भने प्रतिकित्ता सय रुपैयाँमा नै सेयर निष्कासन गरिएको थियो ।
कम्पनीले निर्माण सम्पन्न गरी सञ्चालनमा ल्याएको माथिल्लो हुग्दीले २०७१ चैतदेखि विद्युत उत्पादन गरिरहेको छ ।
माथिल्लो हुग्दीमा लगानी गर्ने समूहले नै ८६ मेगावाटको सोलु दूधकोसी जलविद्युत आयोजना पनि निर्माण गरिरहेको छ ।
सुनुवार सेवा समाजद्वारा विभिन्न संघ-संगठनमा नवनिर्वाचित तीन प्रतिनिधहरूलाई बधाई तथा सम्मान
वि.सं.२०७८ वैशाख ३ शुक्रवार १४:१०