काठमाडौं:  नेपाल नागरिक उड्ययन प्राधिकरणले एयरलायन्सहरूको बक्यौता बुझाउन ताकेता गरेको छ । प्राधिकरणले सोमबार एक सूचना प्रकाशित गर्दै एयरलायन्सहरूको बाँकी रहेको बक्यौत रकम बुझाउन भनेको हो ।

नेपाल नागरिक उड्ययन प्राधिकरणले सार्वजनिक गरेको सूचना अनुसार ११ एयरलाइन्स कम्पनीले बुझाउनुपर्ने बक्यौता रकम पटक पटक सूचना गर्दा पनि नबुझाएकाले पुनः ३० दिनको अल्टिमेटम दिएर बक्यौता बु्झाउन भनेको हो ।

प्राधिकरणले सार्वजनिक गरेको सूचना अनुसार तोकिएको मितिभित्र रकम नबुझाएमा सम्बन्धित कम्पनी र सञ्चालकलाई कालोसूचीमा राख्ने स्पष्ट गरिएको छ भने प्रचलित ऐनअनुसार सञ्चालक, एकाघरका परिवारका एवम् जमानी बस्नेहरूको जयजेथाबाट सरकारी बाँकी बक्यौता असूल उपर गरिने जनाएको छ ।

प्राधिकरणका अनुसार बक्यौता रकम तिर्न बाँकी रहेकामा नेकोन एयर, शिवानी एयर, अल्पाइन एयर, गोरखा एयर, कर्णाली एयर, माउन्टेन एयर, कस्मिक एयर, सांग्रिला एयर, स्काइलाइन एयरवेज, एयर काष्ठमण्डप र नेपाल एयरवेज रहेका छन् ।

प्राधिकरणका अनुसार नेकोन एयरलाइन्सले प्राधिकरणलाई ४ करोड ७० लाख ६० हजार ७५५ रुपैयाँ, शिवानी एयरले  ५५ लाख ५१ हजार ५३ रुपैयाँ, अल्पाइन एयरले ७२ हजार ७२८ रुपैयाँ, गोरखा एयरले २० लाख ३५ हजार २९ रुपैयाँ, कर्णाली एयरले १७ लाख ४६ हजार ३ सय रुपैयाँ, माउन्टेन एयरले १२ लाख ७३ हजार ६९४ रुपैयाँ, कस्मिक एयरले ३ करोड ४७ लाख ५८ हजार ७० रुपैयाँ, सांग्रिला एयरले १५ लाख ३७ हजार ८०० रुपैयाँ, स्काइलाइन एयरवेजले १५ लाख ५० हजार ४ सय रुपैयाँ, काष्ठमण्डप एयरले ७ लाख ३८ हजार ४४७ रुपैयाँ, नेपाल एयरवेजले ५ लाख ५० हजार ५४ रुपैयाँ बक्यौता तिर्न बाँकी रहेको प्राधिकरणले जनाएको छ ।

यो पनि पढ्नुहोस् :

ग्रामिण महिलाको निः शुल्क भिडियो एक्स रे तथा स्वास्थ्य परिक्षण